Uzun tumanida fuqarolarning pensiya va nafaqa pullarini “1Xbet” onlayn o‘yinlariga ishlatib o‘zlashtirgan bank kassiri ushlandi.

Bosh prokuratura huzuridagi Departament Matbuot xizmati xabariga ko‘ra, AT “Xalq banki” Uzun filialining murojaatiga asosan o‘tkazilgan tergovga qadar tekshiruvda, filialning 2-son sayyor kassasi kassiri A.A.ning jinoiy ishi fosh qilindi.

Xabarda aytilishicha, mazkur shaxs joriy yilning fevral-mart oylarida o‘ziga biriktirilgan hududda 278 nafar fuqaroga naqd pul ko‘rinishida chiqarilgan jami 121,1 mln so‘m pensiya va nafaqa pullarini ularning nomidan soxta imzolar qo‘yish orqali o‘zlashtirib yuborgan. Shuningdek, uning ushbu pullarni internet tarmog‘idagi “1Xbet” onlayn kazino o‘yinlariga ishlatib, talon-toroj qilganligi aniqlanib, tekshiruv davomida departament aralashuvi bilan 117 mln so‘m qaytarildi.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlarni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Prokuratura
• Qimor
• Surxondaryo
• Xalq banki