O‘zbekiston Respublikasi Oliy Majlisi Senati Raisi Tanzila Norboyeva boshchiligidagi delegatsiya Birlashgan Arab Amirliklarida rasmiy tashrif bilan bo‘lib turibdi.

Qayd etilishicha, tashrif doirasida savdo, iqtisodiyot, investitsiyalar, energetika, qishloq xo‘jaligi, turizm masalalari bo‘yicha hujjatlar, shuningdek, 10 mlrd AQSh dollaridan ortiq miqdorda savdo-iqtisodiy va investitsiya sohalaridagi bitimlar imzolandi.

Mamlakatlar o‘rtasidagi parlamentlararo aloqalar ham jadal rivojlanmoqda. Senat Raisi boshchiligidagi delegatsiyaning BAA Federal milliy kengashi raisi Saqr G‘obash bilan uchrashuvi ham bo‘lib o‘tgan.

Muloqot chog‘ida O‘zbekiston va BAA parlamentlari o‘rtasidagi munosabatlar izchilligini ta’minlash, xususan, qonun ijodkorligi va parlament nazorati yo‘nalishlarida hamkorlikni yo‘lga qo‘yish yuzasidan fikr almashilgan. Shuningdek, gender tenglik va yoshlar masalalari bo‘yicha o‘zaro tajriba almashish maqsadga muvofiq ekanligi bildirilgan.

Senat Raisi Tanzila Norboyeva parlamentlararo hamkorlik mamlakatlar o‘rtasidagi barcha darajadagi aloqalarni rivojlantirishda muhim mexanizmlaridan biri hisoblanishi, oliy darajada erishilgan kelishuvlar asosida qabul qilingan “yo‘l xaritalari”da belgilangan vazifalar ijrosi ustidan tizimli parlament nazoratini o‘rnatish hamda bu sohada Amirliklar parlamenti bilan o‘zaro hamkorlikni rivojlantirish va “xalq diplomatiyasi”ning muhim jihati hisoblangan “do‘stlik guruhlari” faoliyatini jonlantirish lozimligini ta’kidlab o‘tgan.

Ikki davlat parlamentlari a’zolari hamkorlikning turli yo‘nalishlarida hali ishga solinmagan imkoniyatlar ko‘pligini, iqtisodiyotning turli sohalaridagi tajribadan keng foydalanish zarurligini ta’kidladi. Bunda parlamentlarning birgalikda savdo-iqtisodiy, investitsiya, xizmatlar sohasidagi erishilgan kelishuvlarning amalga oshirilishiga xizmat qiladigan qonunchilikni takomillashtirish bo‘yicha o‘zaro hamkorlikni yo‘lga qo‘yish taklif etildi.

O‘z navbatida, BAA Federal milliy kengashi Raisi Saqr G‘obash O‘zbekiston rahbariyati tomonidan olib borilayotgan keng ko‘lamli, avvalambor, aholini ijtimoiy himoyalash, iqtisodiyotni rivojlantirish va liberallashtirish yo‘nalishidagi islohotlarni yuqori baholadi. S.G‘obash ikki tomonlama munosabatlarda savdo-iqtisodiy, investitsiya sohasidagi hamkorlik Amirliklar uchun ustuvorligini aytib o‘tdi. Prezident Sh.Mirziyoyev ushbu muhim masalaga alohida e’tibor berayotganini inobatga olib, BAA Federal milliy kengashi O‘zbekistonda investitsiya qonunchiligini takomillashtirish sohasida Oliy Majlis vakillari bilan yaqindan hamkorlik qilishga tayyorligini ma’lum qildi.

Suhbat davomida keng qamrovli hamkorlik, shu jumladan, parlamentlararo aloqalarni rivojlantirishdan ikki tomon ham birdek manfaatdor ekanligi bildirildi. Xususan, Oliy Majlis Senati Federal milliy kengashi bilan oliy darajada erishilgan kelishuvlarni amalga oshirish, tegishli qo‘mitalar o‘rtasida hamkorlik aloqalarini yo‘lga qo‘yish, elektron parlament joriy etishda tajriba almashish kabi masalalar bo‘yicha kelishib oldilar.

“Uchrashuv yakunida ikki davlat o‘rtasidagi siyosiy, savdo-iqtisodiy, investitsiyaviy va madaniy-gumanitar, turistik va boshqa aloqalarni rivojlantirishga hamda mustahkamlashga qaratilgan parlament faoliyatini, parlamentning qonun ijodkorligi va nazorat funksiyalarini samarali amalga oshirish, shuningdek, savdo-iqtisodiy, investitsiyaviy, madaniy-gumanitar, ilmiy-texnikaviy, turistik va boshqa sohalarda qonun hujjatlarini qo‘llash amaliyotini rivojlantirish borasida axborot va tajriba almashishni kengaytirish kabi masalalarni qamrab olgan O‘zbekiston Respublikasi Oliy Majlisi Senati va Birlashgan Arab Amirliklari Federal milliy kengashi o‘rtasida hamkorlik to‘g‘risida memorandum imzolandi”, – deyiladi xabarda.

• Gender tenglik
• Senat