Rasmiy Dushanbe noyabr oyining oxiridagi otishmalardan so‘ng Kollektiv xavfsizlik shartnomasi tashkiloti (KXShT) bilan Afg‘oniston chegarasini birgalikda qo‘riqlashga rus harbiylarini jalb etish imkoniyatini muhokama qilmoqda. Bu haqda Reuters xabar berdi.

O‘tgan hafta davomida Afg‘oniston tomonidan o‘qqa tutilishi oqibatida Xitoyning besh fuqarosi halok bo‘ldi, besh nafari yaralandi.

Tojikiston prezidenti Emomali Rahmon 1-dekabr kuni respublika kuch tuzilmalari rahbarlari bilan ishchi yig‘ilish o‘tkazdi. Unda Tojikiston va Afg‘oniston o‘rtasidagi chegaradagi vaziyat va uning qo‘riqlanishini kuchaytirish masalalari muhokama qilindi.

Respublika Xavfsizlik kengashidagi manba Reuters’ga KXShT kuchlarini jalb qilish to‘g‘risidagi qaror qabul qilinmaganini va ko‘rib chiqilayotganini aytgan.

Uning so‘zlariga ko‘ra, Tojikiston-Afg‘oniston chegarasini qo‘shma patrul qilish uchun Rossiyaning xorijdagi eng yirik quruqlikdagi harbiy guruhi bo‘lgan, Tojikistonda joylashgan 201-harbiy bazasini jalb qilish bo‘yicha Rossiya tomoni bilan muzokaralar olib borilgan.

“Biz hozircha (KXShT bilan) muzokaralar olib bormoqdamiz va ular ko‘rib chiqish bosqichida”, – degan Reuters’ning Tojikiston Xavfsizlik Kengashi manbasi. U qaror shu hafta ichida qabul qilinishi mumkinligini istisno qilmagan.

Tojikiston Milliy xavfsizlik davlat qo‘mitasidagi manbalar Rossiya bilan 201-harbiy bazani chegarani birgalikda qo‘riqlashga jalb qilish bo‘yicha muzokaralar olib borilayotganini tasdiqladi.

Reuters manbalariga ko‘ra, gap 201-baza aviatsiya guruhini jalb qilgan holda vertolyot patrul xizmati haqida ketmoqda.

Rossiyaning Tojikistondagi bazasi 2000-yillarning boshlariga qadar Afg‘oniston bilan chegarani qo‘riqlash bilan shug‘ullangan. Chegara uzunligi 1,344 kilometr bo‘lib, tog‘li hududlardan o‘tadi. 2000-yillarning boshidan beri Tojikiston chegarani mustaqil ravishda qo‘riqlaydi.

Hozirda KXShTga oltita davlat — Rossiya, Tojikiston, Qirg‘iziston, Belarus, Qozog‘iston va Armaniston kiradi.

• Chegara
• Hamkorlik
• Rossiya
• Tojikiston