O‘zbekiston Respublikasi Ichki ishlar vazirligi Tezkor-qidiruv departamenti hamda Davlat xavfsizlik xizmati xodimlari tomonidan o‘tkazilgan tezkor tadbirlar davomida inson a’zolari va to‘qimalarining noqonuniy oldi-sotdisi bilan shug‘ullanib kelgan shaxslar ushlandi.

Aniqlanishicha, 1989-yilda tug‘ilgan, muqaddam O‘zbekiston Respublikasi Jinoyat kodeksining 277-moddasi 2-qismi (bezorilik) bilan sudlangan fuqaro turmush o‘rtog‘i bilan oldindan jinoiy til biriktirib, oson daromad orttirish maqsadida internet tarmoqlarida insonlarda rahm-shafqat uyg‘otuvchi videolarni joylab kelgan.

Tezkor surishtiruvlar davomida uning ijtimoiy tarmoqlar orqali inson a’zolari va to‘qimalarining noqonuniy savdosini muntazam yo‘lga qo‘ygani, mijozlarni operatsiya qilish uchun Dushanbe shahridagi Istiqlol klinikasiga olib borganligi ma’lum bo‘ldi. Shuningdek, gumonlanuvchining o‘ziga ham buyrak ko‘chirish amaliyoti o‘tkazilgani va bu jarayonda unga ko‘maklashgan shaxslar aniqlangani bildirildi. Ular orasida Telegram, Instagram va YouTube platformalarida kanal yurituvchi shaxs ham bo‘lgan.

Mazkur holat yuzasidan gumonlanuvchiga nisbatan Jinoyat kodeksining 133-1-moddasi 2-qismi (inson a’zolari va to‘qimalarining oldi-sotdisi) bilan jinoyat ishi qo‘zg‘atilib, qamoq ehtiyot chorasi qo‘llanilgan.

Qonunchilikka ko‘ra, inson a’zolari yoki to‘qimalarining oldi-sotdisi uchun 3 yildan 5 yilgacha ozodlikni cheklash yoxud muayyan huquqlardan mahrum etgan holda 3 yildan 5 yilgacha ozodlikdan mahrum qilish jazosi belgilangan. Agar ushbu jinoyat takroran, xavfli retsidivist tomonidan yoki bir guruh shaxslar tomonidan oldindan til biriktirib sodir etilgan bo‘lsa, 5 yildan 10 yilgacha ozodlikdan mahrum qilish jazosi qo‘llanadi.

• DXX
• IIV
• Jinoyat