Shavkat Mirziyoyev Toshkent shahridagi Amir Temur xiyoboniga tashrif buyurib, buyuk sarkarda va davlat arbobi Amir Temur haykali poyiga gulchambar qo‘ydi.

Ayni kunlarda mamlakatimizda Sohibqiron tavalludining 690 yilligi keng nishonlanmoqda. Shu munosabat bilan yurtimiz bo‘ylab ma’naviy-ma’rifiy, ilmiy va madaniy tadbirlar o‘tkazilmoqda.

Amir Temur XIV asrda murakkab tarixiy sharoitda milliy davlatchilikni tiklab, yurt ozodligi yo‘lida ulkan jasorat ko‘rsatgan buyuk siymo sifatida tarixda muhim o‘rin egallaydi. U asos solgan saltanat jahon sivilizatsiyasida chuqur iz qoldirgan Sohibqiron merosi esa asrlar davomida dunyo olimlari tomonidan o‘rganib kelinmoqda.

Bugungi kunda Yangi O‘zbekiston sharoitida Amir Temur va temuriylar merosini chuqur o‘rganish, uni keng targ‘ib etish alohida ahamiyat kasb etmoqda. Temuriylar Renessansi esa yangi Uyg‘onish davrini barpo etishda muhim ma’naviy asos bo‘lib xizmat qilmoqda. Sohibqironning “Kuch – adolatda” degan hikmati bugungi islohotlarda ham o‘z ifodasini topmoqda. Mamlakatimizda adolatli jamiyat qurish, inson qadrini ulug‘lash, ilm-fan va bunyodkorlikni rivojlantirish borasidagi ishlar aynan shu g‘oyalarga uyg‘un holda olib borilmoqda.

O‘zligimizni anglash, boy tariximizni tiklash va ajdodlarimiz merosini kelajak avlodga yetkazish maqsadida keyingi yillarda yirik ma’naviy-ma’rifiy maskanlar barpo etildi. Jumladan, Toshkentda Islom sivilizatsiyasi markazi, Samarqandda Imom Buxoriy majmuasi bunyod etildi. Shuningdek, 30 yil avval qurilgan Temuriylar tarixi davlat muzeyi ham zamonaviy talablar asosida tubdan qayta ta’mirlandi.

• Amir_Temur
• Shavkat Mirziyoyev