Kelgusi yil poytaxtimizning Yashnobod tumanida yoshlar o‘rtasida yozgi Osiyo o‘yinlari o‘tkaziladi. Shu munosabat bilan hozirda ushbu manzilda Olimpiya shaharchasi barpo etilmoqda. Bu haqda prezident matbuot xizmati xabar berdi.

Keyinchalik ushbu joydan samarali foydalanish maqsadida Olimpiya shaharchasida O‘zbekiston davlat sport akademiyasi tashkil qilinadi. Bundan tashqari, ushbu muassasa huzuriga Jismoniy tarbiya va sport ilmiy tadqiqot instituti hamda Mutaxassislar malakasini oshirish instituti ham o‘tkaziladi. Akademiya tizimida Sport tibbiyoti ilmiy-amaliy markazi, Axborot kutubxona markazi, O‘zbekiston tarixi va xorijiy tillarni o‘qitish markazi ochiladi.

Qayd etilishicha, 2025-2026-o‘quv yilidan boshlab, akademiyaga 3 ta bakalavr yo‘nalishi va 6 ta magistratura mutaxassisligi bo‘yicha qabul boshlanadi. Bitiruvchi talabalarga to‘g‘ridan-to‘g‘ri 6 yillik trenerlik malaka sertifikati beriladi. Olimpiya va paralimpiya kollejlaridan seleksiya qilingan bitiruvchilar to‘g‘ridan-to‘g‘ri ikkinchi kursga qabul qilinadi.

• Qaror
• Sport
• Toshkent