Yoshlar ishlari agentligi kitob sotish bilan shug‘ullanadigan va tarmoqlarda “Tirik kitob” nomi bilan mashhur bo‘lgan Xayrulla Asadovga bukinist do‘konchasi qurib beradigan bo‘ldi. Bu haqda agentlik matbuot xizmati xabar berdi.

Bir necha kun avval u ko‘chma savdo shoxobchasida tekshiruvdan so‘ng ma’muriy jarimaga tortilgani xabar qilingan edi. Tekshiruv davomida u tadbirkorlik faoliyati bilan tegishli ro‘yxatdan o‘tmasdan kitob sotish bilan shug‘ullangani, 20 ming so‘mlik kitob xaridi uchun chek bermagani va ushbu summani kassa apparatiga kirim qilmagani aniqlangan va BHMning 5 baravari (2 mln 60 ming so‘m) miqdorida jarima tayinlangan.

Shuningdek, narxi 1 million 520 ming so‘m bo‘lgan 3 turdagi 100 dona kitobi musodara qilingan. Yoshlar ishlari agentligi hozirgi kunda ko‘chalarda kitob savdosini zamonaviy, tartibli va qulay formatga o‘tkazish bo‘yicha amalga oshirilayotgan ishlar doirasida aniq amaliy choralar ko‘rilishi rejalashtirilganini bildirdi. Kitobdor Xayrulla Asadovni qo‘llab-quvvatlash maqsadida unga zamonaviy bukinist do‘konchasi o‘rnatib berilishi, faoliyatini barqaror va tizimli yo‘lga qo‘yishi uchun ushbu yangi savdo nuqtasiga qo‘shimcha 2000 dan ortiq kitob taqdim etilishi ma’lum qilindi.

Yoshlar ishlari agentligi prezident qarorida kitob savdosiga qulay sharoit yaratish, O‘zbekiston bo‘ylab kitob ko‘chalari va bog‘larini tashkil etish hamda ularni tizimli qo‘llab-quvvatlash ustuvor vazifa etib belgilangani alohida ta’kidlangan.

• Kitob
• Yoshlar ishlari agentligi
• savdo