24-iyun kuni Toshkent botanika bogʻida “Yoshlar kuni” munosabati bilan “Tabiat bilan uygʻunlikda” shiori ostida tadbir boʻlib oʻtadi.

Tadbir davomida Muhammad al-Xorazmiy ixtisoslashtirilgan maktabining EcoUnion jamoasi vakillari tomonidan qogʻozni qayta ishlash, ikkilamchi materiallardan toʻqish, akril kraskalarda shopper ustida rasm chizish kabi mashgʻulotlar oʻtkaziladi.

Shuningdek, tadbirda yosh olimlar tomonidan ishlab chiqilgan ekologik innovatsion loyihalar koʻrgazmasi taqdim etiladi. Qolaversa, ekoblogerlar, ekofaollar, yoshlar vakillari ishtirokida master-klasslar, yoshlarda hayvonlarga mehr uygʻotishga qaratilgan chiqishlar hamda atrof-muhitni muhofaza qilish yoʻnalishida samarali faoliyat olib borayotgan yoshlarni taqdirlash rejalashtirilgan.

Bundan tashqari, tadbir ishtirokchilari oʻrtasida ekologiyaga oid savol-javoblar viktorinasi ham oʻtkaziladi va gʻoliblar taqdirlanadi.

Tadbirni oʻtkazishdan maqsad yoshlarda tabiatga mehr uygʻotish, ularda ekologik madaniyatni yuksaltirish hamda intellektual, ijodiy salohiyatini kamol toptirishdir.

Dastur soat 10:00 da boshlanadi. Tadbirning asosiy qismi va koʻrgazma esa soat 16:00 da boshlanadi.

• Botanika bog‘i
• Yoshlar
• tabiat