AQSH prezidenti Donald Tramp Kanadada ishlab chiqarilgan vinolardan tortib xokkey tayoqchalari va sementgacha bo‘lgan ayrim tovarlarga 50 foizlik boj joriy etdi. Bu haqda Oq uy xabar berdi.

Mazkur qaror Kanadaning Amerika mahsulotlariga nisbatan “kamsituvchi munosabati”ga javoban qabul qilingan.

“Shu tariqa, prezident Tramp Kanadaning Amerika savdosiga nisbatan kamsituvchi munosabati tufayli yuzaga kelgan yuk va kamchiliklarni qoplaydi hamda Amerikaning eng muhim eksport tovarlari — avtomobillar, alkogol va sut mahsulotlari uchun teng raqobat sharoitlarini yaratadi”, deyiladi xabarda.

Yangi bojlar energiya manbalari, kaliyli o‘g‘itlar, baliq va muhim minerallarga daxl qilmaydi, ammo ilgari AQSH, Meksika va Kanada o‘rtasidagi kelishuv (USMCA) bilan bojlardan himoyalangan mahsulotlarga ta’sir qiladi.

Tramp ma’muriyatining yuqori martabali amaldorlari Kanadani adolatsiz savdo amaliyotida ayblab, uning provinsiyalari AQSHdan spirtli ichimliklar sotib olishni to‘xtatganini, AQSH avtomobillariga bojlar joriy etganini va Amerika pishlog‘ini “kamsitgani”ni ta’kidladi.

Kanada AQSHning ikkinchi yirik savdo sherigi bo‘lib, o‘tgan yili ikki davlat o‘rtasidagi tovar ayirboshlash hajmi 716 milliard dollarni tashkil etdi.

Oq uy matbuot xizmatining ta’kidlashicha, Trampning harakatlari Kanadani javobgarlikka tortishga qaratilgan, sababi uning “kamsituvchi munosabati mehnatkash amerikaliklar ahvolini qiyinlashtirib, ularni noqulay vaziyatga solgan”.

Cheklovlar Kanada mahsulotlarining aksariyatiga ta’sir qiladi.

“Prezident o‘tgan yilning boshida amalga oshirgan savdo siyosatiga faqat ikki davlat — Xitoy va Kanada javob choralarini ko‘rgandi”, dedi AQSH prezidenti ma’muriyatining yuqori martabali rasmiysi Financial Times nashriga.

Gazeta Trampning qarori yangi “Shimoliy Amerika savdo urushi”ni keltirib chiqarishi mumkinligini taxmin qilmoqda.

13-iyul kuni Tramp Kanada hukumatini o‘rmonlardagi chiqindilarni tozalashdan bosh tortishda aybladi. U mazkur holat AQSHda havoning ifloslanishiga olib kelishini aytib, Kanadaga ushbu “beparvolik” uchun bojlarni oshirish bilan tahdid qildi.

Yanvar oyi oxirida Tramp Kanadaga, agar u Xitoy bilan savdo bitimi tuzadigan bo‘lsa, AQSHga olib kiriladigan barcha tovarlariga 100 foizlik bojlar qo‘llanishini aytdi. Shuningdek, Kanada bosh vaziri Mark Karnini “gubernator” deb atadi.

AQSH prezidenti ikkinchi muddatining boshidayoq eksportining 75 foizi Shtatlar hissasiga to‘g‘ri keladigan Kanadaga nisbatan bojlar joriy qilgan edi. 2025-yil 1-avgustdan boshlab Tramp umumiy bojni 35 foizgacha oshirdi. Ilgari, 2025-yil mart oyidan boshlab, aksariyat mahsulotlarga 25 foizlik stavka amal qilib kelayotgandi.