Finlyandiya politsiyasi yaqinda Shvetsiya va Daniyada tashkil etilgan Qur'on nusxasini ommaviy ravishda yoqish mamlakatda bo'lishi mumkin emasligini aytdi. Bu haqda 30-yanvar kuni Finlyandiya OAVlari xabar berdi.

Maʼlumotlarga koʻra, Finlyandiya milliy politsiya departamenti muqaddas kitoblarni yoqish “jinoyat” deb hisoblanishini taʼkidlagan.

Huquq-tartibot idoralarining qayd etishicha, bunday hodisa dinlararo tinchlik mezonlarini buzadi. Buning uchun Finlyandiyada jazo mavjud. Diniy jamoalardan birining muqaddas kitobini yoqish esa ana shu mezonga to‘g‘ri keladi.

“Agar kimdir omma oldida bunday harakatlar sodir etsa, politsiya sodir bo'layotgan voqealarga aralashishga majbur bo'ladi”, — degan departament vakili Vesa Pixajoki.

Vazirlik Finlyandiyada konfessiyalararo tinchlik buzilishiga olib kelishi mumkin bo‘lgan harakatlar qonun bilan taqiqlanganini eslatdi.

Turkiya prezidentining matbuot kotibi va bosh maslahatchisi Ibrohim Kalin Turkiya Finlyandiyada Qur’on yoqish taqiqlanganini olqishlashini ma'lum qildi.

Finlyandiyaning Yle telekanali tomonidan 2021-yilda o‘tkazilgan so‘rov shuni ko‘rsatdiki, Finlyandiya deputatlarining aksariyati dinning muqaddasligi to‘g‘risidagi Finlyandiya qonunini o‘zgartirishni istamaydi, unda kufr uchun olti oylik qamoq jazosi berilishi mumkin.

Biroq, ayrim deputatlar so‘z erkinligi bilan bog‘liq muammolardan kelib chiqib, qonunga o‘zgartirish kiritishni talab qilgan. BMTning inson huquqlari qo‘mitasi esa Finlyandiyani jazo qoidasini o‘zgartirishga chaqirgan. Ularning fikricha bu so‘z erkinligini cheklaydi.

• Finlandiya
• Turkiya