Rossiyaning Ukrainaga qarshi urushi boshlanganidan buyon majburan olib ketilgan 2 368 nafar ukrainalik bola o‘z vataniga qaytarildi. Bu haqda Ukraina Adliya vazirligi reyestri ma’lumotlariga tayanib, bolalar huquqlari himoyachisi Katerina Rashevska ma’lum qildi. Uning so‘zlariga ko‘ra, 2026 yil 9 iyul holatiga Rossiya tomonidan noqonuniy deportatsiya qilingan yoki majburan ko‘chirilgan bo‘lishi mumkin bo‘lgan 20 610 nafar bola ro‘yxatga olingan.

Shulardan 2 368 nafari Ukrainaga qaytarilgan. Joriy yilning o‘zida esa 500 nafardan ortiq bola vataniga olib kelingan. Shuningdek, Ukraina bolalarning noqonuniy deportatsiyasiga aloqador shaxslarni javobgarlikka tortish ishlarini davom ettirmoqda. Hozirgacha 25 nafar shaxsga nisbatan gumon e’lon qilingan. Bolalarni mafkuraviy ta’sir ostiga olish bo‘yicha 581 ta, ularni harbiylashtirish bo‘yicha esa 28 ta jinoyat ishi qo‘zg‘atilgan. Ma’lumot uchun, 18 iyun holatiga ko‘ra Ukrainaga qaytarilgan bolalar soni 2 274 nafarni tashkil etgan bo‘lsa, hozirgi ko‘rsatkich 2 368 nafarga yetgan.