Rossiyaning Kaliningrad viloyatida safarbarlik e’lon qilingan taqdirda amalga oshiriladigan choralar bo‘yicha harbiy mashg‘ulotlar o‘tkazilgani ma’lum bo‘ldi. Bu haqda The Wall Street Journal G‘arb razvedka xizmatlari vakillariga tayanib xabar berdi.

Nashr manbalariga ko‘ra, iyul oyida o‘tkazilgan mashg‘ulotlar davomida hududda safarbarlik tadbirlarini tashkil etishga tayyorgarlik darajasi tekshirilgan. Shuningdek, safarbar qilingan harbiylarni joylashtirish, ularni oziq-ovqat va qurol-yarog‘ bilan ta’minlash imkoniyatlari sinovdan o‘tkazilgan.

G‘arb maxsus xizmatlari vakillarining ta’kidlashicha, shunga o‘xshash mashg‘ulotlar Rossiyaning boshqa hududlarida ham o‘tkazilmoqda. Biroq ular aynan qaysi hududlarda bunday tadbirlar tashkil etilayotganini oshkor qilmagan.

WSJ manbalari mazkur mashg‘ulotlarni Rossiyada yangi safarbarlik to‘lqiniga tayyorgarlik sifatida baholagan. Ularning fikricha, sentyabr oyidagi parlament saylovlariga qadar safarbarlik e’lon qilinishi ehtimoli past.

Shu bilan birga, nashr suhbatlashgan ekspertlar agar Rossiya hukumati kuzda yangi safarbarlik e’lon qilsa, uning amaliy samarasi qanchalik yuqori bo‘lishi hozircha noma’lumligini qayd etgan. Mutaxassislar qish oylarida murakkab ob-havo sharoiti jangovar harakatlarning sur’atini pasaytirishi mumkinligini ta’kidlamoqda.

Karnegi jamg‘armasi tahlilchisi Maykl Kofmanning fikricha, yangi safarbarlik to‘lqini frontdagi vaziyatga 2027-yildayoq ta’sir ko‘rsatishi mumkin.

Yangi safarbarlik ehtimoli haqidagi xabarlar iyun oxiridan buyon tarqalmoqda. Eng ko‘p muhokama qilinayotgan taxminlardan biriga ko‘ra, Rossiyada safarbarlik sentyabrdagi saylovlardan keyin e’lon qilinishi mumkin.

Rossiya rasmiylari esa yangi safarbarlik rejalari mavjudligini inkor etib kelmoqda. Biroq 2022-yil sentyabrida safarbarlik e’lon qilinishidan oldin ham Rossiya hukumati shunga o‘xshash bayonotlar bergan edi. Shu bilan birga, 2022-yilda boshlangan safarbarlikni rasman yakunlash to‘g‘risida alohida farmon hozirgacha e’lon qilinmagan.

Yangi safarbarlik haqidagi xabarlar fonida “Kovcheg” huquqni himoya qilish tashkiloti avgust oyida rossiyaliklarning mamlakatdan emigratsiya qilish imkoniyatlariga qiziqishi keskin oshganini ma’lum qilgan.