BBCning ma’lumotiga ko‘ra, endi Yaponiyada velosiped haydab ketayotib, mobil telefondan foydalangan fuqarolar olti oygacha qamoq jazosiga hukm etilishi mumkin.

Yo‘l harakati qoidasi to‘g‘risidagi qonunga muvofiq qoidabuzarlar olti oygacha qamoq jazosiga hukm etilishi yoki 100 ming iyena (655 dollar) miqdorida jarimaga tortilishi mumkin.

Mahalliy OAV maʼlumotlariga ko‘ra, 2021-yildan boshlab velosipedchilar ishtirokidagi avariyalar soni oshgan, chunki pandemiya vaqtida odamlar jamoat transporti o‘rniga ko‘proq velosipeddan foydalanishga o‘tgan. Endi hukumat velosipedchilarni nazorat qilishga shoshilmoqda.

Yangi qoidalar harakat vaqtida telefondan foydalanishdan tashqari, mast holatda velosiped boshqarishni ham taqiqlaydi — alkogol taʼsirida velosiped haydagan fuqaro 3 yilgacha ozodlikdan mahrum etiladi yoki 500 ming iyena (3,2 ming dollar) jarimaga tortiladi.

Yangi qonun kuchga kirishi bilan Osaka rasmiylari besh nafar qoidabuzar aniqlanganini, xususan, ularning ikki nafari mast holatda velosiped boshqarganini maʼlum qildi. Yana bir erkak boshqa velosipedchi bilan to‘qnashib ketgan.

Yangi qoidalarga ko‘ra, bu turdagi avariyada aybdor bo‘lgan velosipedchi 300 ming iyena (2 ming dollar) jarimaga tortilishi yoki 1 yilgacha ozodlikdan mahrum etilishi mumkin.

• Jahon
• Qonun
• Yangilik
• Yaponiya