“Xiaomi” o‘zining yangi tozalash gadjetini taqdim etdi – “Mijia Wireless Floor Sweeping Machine 2 Lite”. Bu vertikal aqlli elektr pol yuvgich bo‘lib, u uchta rejimda ishlaydi: quruq tozalash, namlik va quritish.

Elektron “shvabra”da ifloslanish darajasini baholash va quvvatni mos ravishda sozlash uchun kompyuter ko‘rinishidan foydalanadigan “ta’sirchan sensori” mavjud. Ushbu pol yuvgichning tavsiyanomasida soya sousi, ketchup, sut va uch kunlik qahva izlarini olib tashlashi mumkinligi aytiladi.

Aylanadigan cho‘tka uchun o‘z-o‘zini tozalash tizimi ham joriy qilingan. Foydalanuvchilar qurilmani zaryadlash stansiyasiga ulaganida u avtomatik ravishda ishga tushadi. Ikki daqiqada cho‘tka inson aralashuvisiz tozalanadi va quritiladi.

4000 mA/soat quvvatga ega batareya yordamida u 40 daqiqa tinimsiz ishlay oladi – ishlab chiqaruvchiga ko‘ra, bu butun uyni tozalash uchun yetarli. Toza suv uchun gajet ichidagi idishning hajmi 780 ml, ishlatilgan suvni yig‘ish uchun esa – 550 ml.

“Mijia Wireless Floor Sweeping Machine 2 Lite” 1999 yuanga (taxminan 3 300 000 so‘m) baholangan. Joriy yilning 15-mart kuni qurilma “Xiaomi Youpin” kraudfandingida (o‘z pullarini ixtiyoriy ravishda birlashtirgan insonlar jamoasi) 1749 yuanlik (2,9 mln so‘m) arzonlashtirilgan narxda paydo bo‘ladi, aksiya 22-mart kuni tugaydi. Tez kunlarda yangilik ochiq sotuvga chiqishi kutilmoqda.

Qayd etish mumkin, “Xiaomi” korporatsiyasi 2010-yil 6-aprel kuni xitoylik tadbirkor Ley Jun tomonidan asos solingan. 2021-yilga kelib kompaniya jahon bozorida smartfon ishlab chiqarish bo‘yicha yetakchiga aylandi. Bundan tashqari, maishiy texnika, planshetlar, aqlli soatlar, dasturiy ta’minot, elektr skuterlar, elektron velosipedlar va boshqa ko‘plab qurilmalarni ishlab chiqaradi.

2010-yil 16-avgustda “Xiaomi” Android tizimiga asoslangan va “Samsung TouchWiz” va “Apple iOS” uslublarini birlashtirgan MIUI proshivkasini rasman ishga tushirdi.

Birinchi smartfon – “Mi 1” 2011-yil avgust oyida e’lon qilingan. U ikkita versiyada paydo bo‘lgan. 2012-yil avgust oyida esa kompaniya “Mi 2” smartfonini taqdim etdi, 2013-yilning sentyabriga kelib esa kompaniya 10 milliondan ortiq qurilma sotishga muvaffaq bo‘ldi.

• Xiaomi