Mutaxassislar “Jeyms Uebb” teleskopi tomonidan suratga olingan galaktikalar aslida mavjud bo‘lmasligi kerakligini ta’kidlamoqda.

Astronomlar Katta portlashdan ko‘p o‘tmay paydo bo‘lgan bir nechta yangi galaktikalarni payqashdi. Ularning eng diqqatga sazovor tomoni – bu ularning ulkan massasi. Mavjud barcha modellarga ko‘ra, bunday galaktikalar koinotning dastlabki davrida fazoda paydo bo‘lishi mumkin emas edi.

Hammasi bo‘lib oltita anomal katta galaktikalar topildi. Ular kuchli “Jeyms Uebb” kosmik teleskopi yordamida kuzatilmoqda, deb yozadi “Nature” jurnali.

Qayd etilishicha, galaktikalarning umumiy og‘irligi Quyosh massasidan yuzlab milliard marta katta. Shu bilan birga, galaktikalar ancha qadimiy – ular taxminan 3,8 milliard yil oldin sodir bo‘lgan Katta portlashdan keyin darhol paydo bo‘lgan.

Massa va yosh o‘rtasidagi tafovut olimlarni boshi berk ko‘chaga olib boradi.

“Biz topgan oltita galaktikaning yoshi 12 milliard yildan oshgan. Katta portlashdan atigi 500-700 million yil o‘tgach, ular bizning Quyosh massasidan 100 milliard marta kattaroq hajmga yetadi. Bu hozirgi modellar doirasida mavjud bo‘lish uchun juda ko‘p”, – deydi Avstraliyaning Svinbern texnologiya universiteti mutaxassislari.

Olimlar ushbu kashfiyot koinotdagi eng qadimgi galaktikalar qanday paydo bo‘lganligi haqidagi tushunchani o‘zgartirishi mumkin, deya xulosa qilmoqda. Ular aniq qanday paydo bo‘lganligini aniqlash uchun topilgan anomaliyalarni o‘rganishni davom ettirmoqdalar. Taxminlarga ko‘ra, topilmalar aslida yangi supermassiv qora tuynuklarning noma’lum sinfiga tegishli.

• Galaktika
• Olimlar