Shavkat Mirziyoyev 16-mart kuni Davlat soliq qoʻmitasiga tashrif buyurdi. Bu haqda Prezident matbuot xizmati xabar berdi.

Qayd etilishicha, Davlat soliq qo‘mitasida Prezident soliq ma’murchiligini isloh qilish va sohaga axborot texnologiyalarini keng joriy etish masalalari yuzasidan yig‘ilish o‘tkazgan. 

Shuningdek, Soliq qo‘mitasi raisi Sherzod Kudbiyev soliq ko‘rsatkichlari, o‘zgarishlar haqida axborot bergan. U shuningdek, fuqarolarga qaytarilayotgan cashback (keshbek) tizimini real vaqt rejimi va real chekda davlat rahbariga ko‘rsatib berdi va shunday sharhladi:

– Shu paytgacha faqat soliqchi soliq yiqqan. Tarixda birinchi marta sizning qaroringiz bilan, yanvar oyidan boshlab, odamlarga keshbek qilib qaytarib beryapmiz. Fuqarolar do‘kondan olgan chekini mobil ilova orqali QR kodini skanerlaganidan so‘ng, chek tizimga muvaffaqiyatli qabul qilinadi. Agar chek 52 ming so‘mga urilgan bo‘lsa, 520 so‘m fuqaroning hamyoniga tushadi. Ya’ni, 1 foizi qaytariladi. Odamlar endi chekni sotuvchilardan o‘zi talab qilib olyapti.  Yanvar oyining o‘zi uchun 25 milliard so‘mdan ziyod keshbek urilgan. Rad etilgan cheklar ham bor. Agar cheklarda mahsulotning identifikatsiya nomeri noto‘g‘ri kiritilgan bo‘lsa, tizim qabul qilmaydi. Bu orqali xaridor keyin o‘sha do‘konga kirmaydi, yoki chek yozgan sotuvchiga savol berishga odatlanadi. 

O‘zbekistondagi har bir kassa endi QR kodi bo‘lgan chek berishi kerak. Agar ular bunday chek bermasa, yoki plastikka savdo qilishni istamasa, do‘konda olishib-talashib o‘tirmay, xaridor “Soliq hamkor" tizimi orqali ushbu tadbirkorlik subyekti haqida xabar bera oladi, deydi Sherzod Kudbiyev. 

Eslatib o‘tamiz, avvalroq Shavkat Mirziyoyev Qozog‘iston prezidenti bilan telefon orqali muloqot qilgani haqida xabar berilgan edi.

• DSQ
• Prezident
• Shavkat Mirziyoyev