Yozning issiq kunlarida muzqaymoq va salqin ichimliklarga nisbatan talab juda oshib ketadi. Qanchalik sovuq bo'lmasin muzqaymoq ham juda tez erib ketadi. Bu vaziyatda qanday yo'l tutgan ma'qul? Albatta, siz bilan hozir milksheyk (sutli kokteyl) tayyorlashni o'rganamiz. Garchi unga meva va muzqaymoq qo'shilsa-da, biz uni mevali sut yoki erigan muzqaymoq deya olmaymiz. Bir stakanda ikkita lazzatni birlashtirgan mazali ichimlik bu yuqorida aytganimizdek – milksheyk!
Issiq kunda tetiklik baxsh etadigan, qishda esa shirin ta'mi bilan quvonch qo'shadigan milksheyk tayyorlash yosh bolalar uchun kunlik ratsiondan joy olishi juda foydali. Bu ichimlik uchun alohida qurilma sotib olish ham shart emas. Blender yoki chopperning o'zi yetarli bo'ladi. Hozir siz bilan 3 xil sutli kokteyl tayyorlashni bo'lishamiz, o'ylaymizki, bu ichimlik dasturxoningiz ko'rkiga ko'rk qo'shib tura oladi.
Shokoladli milksheyk
Shokoladli milksheyk uchun kerakli mahsulotlar:
sovuq sut;
shokoladli muzqaymoq;
3-4 dona kubik shaklidagi muz;
ko'pirtirilgan qaymoq (o'z xohishingizga ko'ra).
Eng avval sut va muzqaymoqni blenderga soling va aralashtiring.
Agar xohlasangiz stakanni bezatish uchun shokolad qaylasidan foydalanamiz. Ustiga bezak uchun ko'pirtirilgan qaymoq solamiz va shokolad bo'lakchalarini joylaymiz.
Bananli milksheyk
Bolalar bu milksheykni juda yaxshi ko'rishadi. Nima uchun bu ichimlikni tayyorlash juda oson bo'lsa ham biz uni sotib olishimiz kerak? Men bu yerda muzqaymoqli milksheykning tarifini keltirib o'taman.
Bananli milksheyk uchun kerakli ingrediyentlar:
2 ta banan;
2 stakandan kamroq sovuq sut (taxminan 1,5 stakan);
4 oshqoshiq vanilli muzqaymoq;
muz (ixtiyoriy).
Bananli milksheykni tayyorlash uchun avvalo bananni po'chog'idan tozalaymiz va 2-3 bo'lakka bo'lamiz.
So‘ngra banan, sut va muzqaymoqni blenderga solamiz. Blenderni avval past darajada ishga tushiramiz va sekin yuqorilatamiz, shunda barcha mahsulotlar parchalanadi va to'liq aralashadi.
Nihoyat, ixtiyoriy muz bo‘laklarini qo'shing! Ushbu sutli kokteylni darhol, sovuq holicha iste’mol qilish mumkin. Yoqimli ishtaha.
Qulupnayli milksheyk
Bahor oyining eng sevimli mevasi – qulupnay qo‘shilgan milksheyk tayyorlash uchun kerakli mahsulotlar:
qulupnay 10 dona;
sut – 2 stakan;
4 oshqoshiq muzqaymoq;
shakar;
muz (ixtiyoriy).
Qulupnay, sut, muzqaymoq, shakarni blenderga solamiz va aralashtiramiz. Ushbu sutli kokteylga shakar solishdan asosiy maqsad, qulupnay biroz nordon bo'lganligi uchun unga shirin ta’m berish juda muhim. Tayyor suyuqlikka ixtiyoringizga ko'ra muz soling va shu holatda ichishingiz mumkin. Yoqimli ishtaha.
Bir narsani unutmang, har qanday mahsulotni me’yoridan ortiq iste’mol qilish uning foydali xususiyatlarini kamaytirib yuborishi tabiiy. Shu sababdan ham salomatligingizni asrang.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!