Jizzax viloyatining Zomin tumanida joylashgan dor yo‘li auksion orqali sotildi. Savdolar E-auksion platformasida bo‘lib o‘tdi.

Auksionga kanat yo‘lini boshqaruvchi Zomin Ropeway kompaniyasining 100 foiz ulushi qo‘yildi. Savdolar yakunida Ref Ropeway Invest kompaniyasi 215 milliard 67 ming so‘m taklifi bilan g‘olib bo‘ldi.

Savdo obyekti majmuasi tarkibida Shveysariyaning Bartholet Maschinenbau AG kompaniyasi tomonidan o‘rnatilgan 2 102 metr uzunlikdagi osma dor yo‘li hamda mijozlarni tashish uchun 36 ta kabina, shuningdek 351 ta o‘rinli ko‘p qavatli avtoturargoh, 152 o‘rinli restoran, kafe, bolalar o‘yin maydonchasi va boshqa xizmat xonalari mavjud.

G‘olib kompaniyaga Zomin Ropeway osma dor yo‘lining soz holatda bo‘lishi va xavfsizlik qoidalariga qat’iy rioya qilgan holda ekspluatatsiya qilinishi, shu jumladan, osma dor yo‘lining tuzilishi va ulardan xavfsiz foydalanish qoidalariga, dor yo‘liga texnik xizmat ko‘rsatish va ta’mirlash reglamentiga qat’iy rioya qilinishi, shuningdek, ishga malakali xodimlarni jalb qilish bo‘yicha javobgarlik yuklatildi.

Ma’lumot uchun, “Zomin” sayyohlik-rekreatsion zonasida dor yo‘li 2023-yil avgust oyida ochilgan edi.

• Auksion
• Jizzax
• Zomin