Chet tilini o‘rganishni xohlaysiz-u, ammo sira ham jonkuyar o‘qituvchi topa olmayapsizmi? Mobil telefoningizga bir qancha bepul ilovalardan o‘zingizga mosini yuklab olib, o‘zingiz mustaqil shug‘ullanarsiz. Shunda bekatda turganingizda yoki avtobusda uzoq vaqt yo‘l bosib o‘tayotganingizda ham vaqtni bekor ketkazmaysiz. Quyida xorijiy til o‘rganishga yordam beradigan bir qancha ilovalar ro‘yxatini keltiramiz. 

1.  Duolingo

Duolingo chet tilini noldan boshlab o‘rganuvchilarga ham, davom ettituvchilarga ham mos ilova. U sizga kichik gaplar, rasmlar va audio yordamida yangi so‘z, so‘z birikma va gap tuzishlarni o‘rgatib boradi. Mashqlar yordamida chet tilidagi so‘zni eshitish va suratini ko‘rish orqali o‘z ona tilingizga tarjima qilishingiz mumkin. 
O‘rganish mumkin bo‘lgan tillar: ingliz, ispan, fransuz, nemis, xitoy, yapon, koreys, italyan, portugal, golland, irland, shved, turk, esperanto, indonez, chex, yunon, hind, rus, ukrain, ivrit va boshqalar.

2.  Busuu

Ushbu ilovada o‘rganishni xohlagan tilingizni tanlaysiz va qaysi darajada ekaningizni ko‘rsatasiz. Masalan, boshlang‘ich, davom ettiruvchi va ilg‘or o‘rganuvchi. Busuu’ning eng yaxshi tomoni shundaki, u kundalik hayotda ko‘p qo‘llaniladigan so‘z va jumlalarni boshlang‘ich darajadayoq o‘rgatadi. Ilova sizga yangi so‘zlarni alohida va gaplarni ichida kelgan holatda o‘rgatadi. Ma’lum vaqtdan keyin esa bilimlaringizni tekshirib ko‘radi.   
O‘rganish mumkin bo‘lgan tillar: ingliz, nemis, fransuz, ispan, italyan, rus, turk, yapon, xitoy, polyak, portugal.

3.  Memrise

Boshqa ilovalardan farqli ravishda Memrise offlayn kurslarni ham taqdim etadi. Til o‘rganish darajangizni o‘zingiz tanlaysiz. Memrise’ning yana bir farqli jihati u chet tilidagi so‘zlarni o‘rgatishda tezroq yodlab olishingiz uchun ona tilingizga talaffuz jihatidan yaqinini tanlaydi. Bundan tashqari u tarjimalarni aralashtirilgan holda sizga beradi, bu bilan siz bir vaqtning o‘zida bir nechta yangi so‘zlarni o‘rganasiz. 
O‘rganish mumkin bo‘lgan tillar: ingliz, fransuz, nemis, rus, ispan, italyan, yapon, arab, turk, portugal, xitoy, koreys, shved, polyak, mo‘g‘ul va boshqalar.

4.  Rosetta Stone

Rosetta Stone asosan sayohatchilar uchun mo‘ljallangan ilova bo‘lib, asosiy so‘z va so‘z birikmalarni o‘rgatadi. O‘rganayotgan chet tilingizdagi yangi so‘zlar rasmlar orqali ko‘rsatiladi va audioda talaffuzini eshitasiz. Undan so‘ng talaffuzingizni tekshirish uchun o‘zingiz yangi so‘zni takrorlashingiz kerak. O‘zingiz xohlamagan mavzularni o‘tkazib yuborishingiz yoki bir tartibda o‘rganishingiz imkoni bor.
O‘rganish mumkin bo‘lgan tillar: ingliz (Britaniya), ingliz (AQSh), ispan (Lotin Amerika), ispan (Ispaniya), fransuz, italyan, nemis, xitoy, rus, arab, koreys, yunon, ivrit, hind, irland, fors, turk, shved, polyak va boshqalar. 

5.  Clozemaster

O‘yinlar orqali til o‘rganishga asoslangan ilova. Berilgan gapda tushirib qoldirilgan so‘zlarni mosini tanlashingiz kerak bo‘ladi. Shu tariqa eng ko‘p qo‘llaniladigan so‘zlarni mashq qilib borasiz. Clozemaster asosan o‘rganib bo‘lgan so‘zlaringizni sinash uchun yoki ancha yillar oldin o‘rgangan bilimlaringizni qayta tiklab olish uchun yordam beradi.  
O‘rganish mumkin bo‘lgan tillar: fransuz, nemis, ispan, ingliz, arab, xitoy, golland, italyan, turk, koreys, portugal va boshqalar.

6.  Beelinguapp

Agar til o‘rganish jarayoningiz kitoblarni ham qamrab olishini istasangiz, Beelinguapp aynan siz uchun. Ilova sizga sevimli hikoyalaringizni audio shaklida taqdim qiladi. Istasangiz o‘zingiz o‘qishingiz mumkin. Ekranda o‘rganayotgan tilingiz va ona tilingizdagi matnni bitta ekranga qo‘yishingiz mumkin. Aynan sizni qiziqtirgan gap qanday talaffuz qilinishini o‘rganish uchun belgilashingiz va faqat o‘sha gapning audiosini eshitishingiz, ortidan takrorlashingiz mumkin. 
O‘rganish mumkin bo‘lgan tillar: rus, ingliz, nemis, fransuz, turk, xitoy, arab, yapon, italyan, ispan, koreys, hind va portugal.

Ikki va undan ortiq tilda gapirish xotirani yaxshilaydi, dunyoqarashni kengaytiradi va sizga ko‘pgina imkoniyatlar eshigini ochadi. Xo‘sh, endi nimani kutyapsiz?

Ziyodaxon G‘ulomova tayyorladi.