Sirdaryodan yana bir jasad topildi, qidiruv ishlari davom etmoqda

Namangan viloyati FVB Sirdaryoda sodir bo‘lgan fojiali hodisalar yuzasidan rasmiy ma’lumot berdi.

Ma’lum qilinishicha, 26-iyul kuni 112 qisqa raqamiga Namangan tumanining Sho‘rqo‘rg‘on mahallasi hududidan oqib o‘tuvchi Sirdaryoga 22 yoshli fuqaro tushib ketgani haqida xabar kelib tushgan. Shundan so‘ng FVB g‘avvoslari tomonidan qidiruv-qutqaruv ishlari boshlangan.

27-iyul kuni qutqaruvchilar daryodan bir fuqaroning jasadini topib, qirg‘oqqa olib chiqdi.

Hozirda taqiqlangan hududlarda cho‘kib ketgan yana ikki nafar fuqaroni qidirish ishlari davom ettirilmoqda.

FVBning qayd etishicha, joriy yoz mavsumida taqiqlangan joylarda cho‘milish oqibatida bir necha fojiali holatlar kuzatilgan. Shu munosabat bilan fuqarolarga faqat ruxsat etilgan va xavfsiz maskanlarda cho‘milish, ota-onalarga esa farzandlarini suv havzalari bo‘yida nazoratsiz qoldirmaslik tavsiya etildi.