2021-yil 1-avgustdan boshlab ta’lim kreditlarini moliyaviy resurslar bilan ta’minlash uchun Moliya vazirligi huzurida Ta’lim kreditini moliyalashtirish jamg‘armasi tashkil etiladi. 

Bu borada O‘zbekiston Prezidentining “Oliy ta’lim tashkilotlarida ta’lim olish imkoniyatlarini yanada kengaytirish chora-tadbirlari to‘g‘risida”gi qarori qabul qilindi.

Qarorga muvofiq, Jamg‘armaga Davlat byudjetidan 2021-yilda 1 trillion so‘m, keyingi yillarda mavjud talabdan kelib chiqib mablag‘ ajratib boriladi.

Ta’lim kreditini berish uchun Moliya vazirligi tijorat banklariga Markaziy bank asosiy stavkasidan 4 foiz past stavkada (amalda 10 foiz) maqsadli resurs mablag‘lari ajratadi.
Tijorat banklari ajratilgan maqsadli mablag‘larga 4 foiz bank marjasini qo‘shgan holda Markaziy bank asosiy stavkasida ta’lim kreditini ajratadi.
Ta’lim krediti Markaziy bank asosiy stavkasi (amalda 14 foiz) miqdorida talaba oliy ta’lim muassasasidagi o‘qishini tamomlagandan so‘ng yettinchi oydan boshlab 7 yil mobaynida qaytarish sharti bilan beriladi.