Farg‘ona viloyatining Qo‘shtepa tumanida Obodonlashtirish boshqarmasi mas’ul shaxslari tomonidan 158,7 mln so‘mlik budjet mablag‘lari talon-toroj qilingani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Ma’lum qilinishicha, boshqarma mas’ul shaxslari “F. A.” xususiy korxonasi va “Q. Z.” MCHJ bilan tuzilgan shartnomalar asosida 3,9 mlrd so‘mlik 6 084 tonna asfalt sotib olgan.

Ular 26 ta mahalla fuqarolar yig‘ini hududidagi 61 ta ko‘chada amalda bajarilmagan ishlarga 283 tonna asfalt sarflangani haqida qo‘shib yozuv kiritgan. Natijada 158,7 mln so‘mlik budjet mablag‘lari talon-toroj qilingan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlarni qalbakilashtirish yoki ulardan foydalanish) bilan jinoyat ishi qo‘zg‘atilgan.

Hozirda holat yuzasidan tergov harakatlari olib borilmoqda.