Kitob o‘qishni yaxshi ko‘rasizmi? Ammo kundalik ishlaringiz, to‘lib qolgan grafik tufayli mutolaaga vaqt ajratolmayapsizmi? Sizga ko‘proq kitob o‘qishga yordam beradigan tavsiyalar to‘plamini taqdim etamiz

1. Kitobni o‘zingiz bilan olib yuring

Bu juda oddiy: o‘qishni istagan kitobingizni yoningizda olib yuring va bo‘sh vaqt bo‘ldi deguncha uni o‘qishni boshlang. Tushlik vaqtidagi tanaffusda, uyga ketishda, jamoat tranportida ketayotib ham o‘qishingiz mumkin. Asosiysi, tanlagan kitobingiz qiziqarli bo‘lishi kerak. Shunda sizda uni o‘qishga nisbatan ishtiyoq paydo bo‘ladi.

2. Elektron kitobga o‘ting

Elektron kitobni olib yurish juda oson (ungi telefoningizga ham yuklab olsangiz ham bo‘ladi). Me’yorni saqlasangiz, ular ko‘rish qobiliyatingizga zarar keltirmaydi, har qanday hajmdagi sumkachangizga bemalol sig‘ib ketaveradi. 

3. Mutolaa uchun vaqt ajratish
Ish grafingiz juda band bo‘lsa ham, kitob mutolaasi uchun muayyan vaqt ajratishga harakat qiling. Uxlashdan yarim soat oldin yoki ertalab 20 daqiqa mutolaa qilishga odatlanish mumkin. Kuniga 100 sahifa o‘qiyman, kabi o‘zingizga eshitilishi hatto og‘ir bo‘lgan hajmlar, me’yorlar belgilab olishni tavsiya etmaymiz. Tinch holatda qancha kitob o‘qiy olishingizni tekshirib ko‘ring va shunga qarabgina me’yor belgilashingiz mumkin.   

4. Ijtimoiy tarmoqlarga ketayotgan vaqtingizni chegaralang
Ijtmoiy tarmoqlar vaqtingiz “qotillari”dir. Vaqtincha ulardan chalg‘ib, unga sarflanayotgan vaqtni kitob mutolaasiga ajratsangiz nima qiladi? Bu qiyin bo‘lsa ham, bir marta amalga oshirib ko‘ring. Natijasini, albatta, his qilasiz.

5. Kitobni ko‘rinadigan yerga qo‘ying

Bir vaqtning o‘zida bir nechta kitob o‘qiyotgan bo‘lsangiz, ularni uyning har qayeriga joylashtirib chiqish tavsiya etiladi. Aniqrog‘i, ularni qayerda ko‘p vaqt o‘tkazsangiz o‘sha joylarga qo‘ying. Kitob doim olib o‘qishga oson yerda tursa, bu sizga mutolaa qilish haqida eslatib turadi.

6. Birgalikdagi mutolaa...
Insonning bir o‘zi kitob o‘qishi yaxshi. Ammo buni do‘stlaringiz bilan birga amalga oshirsangiz, yanada yaxshi. Shunda sizda muhokama qilish, fikrlaringizni bo‘lishish mumkin bo‘lgan insonlar topiladi. Bu yanada ko‘proq mutolaa qilishga undaydi.