Ba’zida sovg‘a tanlashga qiynalib ketasan kishi. Ammo yaqinlarimizning xususiyatlaridan kelib chiqib izlansak, sovg‘a tanlash osonlashadi. Masalan, temperamentini bilish foydadan holi emas.

Melanxolik

Bu ta’sirchan, hissiyotli, romantik va sezgir odam. Melanxoliklar tabiatan introver – ular o‘z olamida yashaydi. Orzu qilish, fantaziya qilishni, dunyoning nomukammalligi haqida o‘ylashni yoqtiradi.
Melanxolikka vintaj (o‘tgan asrlarga xos) yoki antikvar buyumlar yoqadi. Unga san’at asarlarini sovg‘a qilsangiz bo‘ladi. Masalan, suratlar, haykalchalar, tumorlar. Shuningdek, hissiyotli va juda chuqur ma’noli roman taqdim etishingiz mumkin.
Melanxoliklar odatda ijodkor bo‘ladi, shuning uchun “o‘z qo‘ling bilan yasa” turidagi to‘plam, antistress albom, bo‘yoqlar sovg‘a qilsangiz xursand bo‘ladi.
O‘z fikrlarini yozib borishi uchun sifatli, charm muqovali kundalik ham ular uchun yoqimli sovg‘a.

Xolerik

Xoleriklar hissiyotli, qiziqqon, ammo gina saqlamaydigan kishilardir. Ular tashabbuskor, harakatchan va mas’uliyatli. Yangi ishga tez kirishadi va kundalik zerikarli ishlarni yoqtirmaydi.
Ekstremal haydash yoki suvostida suzish kurslari uchun sertifikat bersangiz yoqishi mumkin. Xoleriklar qiyin vaziyatlardan chiqib ketishni yaxshi ko‘radi. Shu sababdan ular uchun qandaydir murakkab o‘yin tayyorlashingiz ham mumkin.
Xoleriklar o‘zlarining ahamiyatli inson ekanligiga ishonadi. Shuning uchun sovg‘a qimmat bo‘lmasa-da, o‘rami hashamdor bo‘lishiga harakat qiling. Uni dabdaba bilan, masalan, she’r aytib, katta sharlar bilan bering.
Xoleriklar ichida rahbarlari ko‘p. Ularga ismi yozilgan ruchka, stol ustiga kanselyariya to‘plami, charm hamyon kabilarni berishingiz mumkin.

Flegmatik

Flegmatik – sokin va bosiq odam. Ishda mantiqli va detallarga e’tiborli. Uni tizginidan chiqarish deyarli ilojsiz. U yaxshigina oilaparvar. Bunday kishilar sabrli, oqko‘ngil bo‘ladi.
Flegmatiklar aqlli, ammo bu xususiyati bilan maqtanmaydi. Mantiqiy vazifalarni yoqtiradi. O‘ylantiradigan filmga chipta sovg‘a qilsangiz xursand bo‘ladi. Masalan, yangi detektiv yoki kutilmagan tarzda tugaydigan filmga. Flegmatiklar qiziqarli boshqotirmalarni yaxshi ko‘radi. Nima demoqchiligimizni tushungandirsiz?
Shuningdek, flegmatiklar konservativ hamda amaliyotni yoqtiruvchilardir. Ularga uy uchun texnika yoki gadjet ma’qul bo‘ladi. Masalan, qahva maydalagich, power-bank, termos, ko‘p funksiyali pult, sok chiqargich va hokazolar.

Sangvinik

Sangviniklar – hayotsevar, quvnoq kishilar. Biror yangi narsani o‘rganishga qiziqadi. Tez aloqaga kirishadi. Hammaga xush kayfiyat ulashadi.
Sangvinik uchun qandaydir qiziqarli shahar yoki mamlakatga sayohat ajoyib sovg‘a bo‘ladi. Kurslarga yoki qiziqarli master-klasslarga sertifikat taqdim eting. 
Sangviniklar kreativlikni yoqtiradi, shuning uchun sovg‘angiz hamyonbop bo‘lsa-da, original bo‘lishiga intiling. O‘z qo‘llaringiz bilan tayyorlagan narsani juda qadrlashadi.
Sangviniklar yumorni ham yaxshi ko‘radi. Kulgili gap yozilgan futbolka, hazilomuz buyumlarni sovg‘a qilsangiz, xursand bo‘lishi aniq.