Toshkent shahrida korrupsiyaga qarshi kurash doirasida o‘tkazilgan tezkor tadbir davomida ichki ishlar organlarining mas’ul xodimiga nisbatan jinoyat ishi qo‘zg‘atildi. Huquqni muhofaza qiluvchi idoralar ma’lumotiga ko‘ra, u tadbirkorga nisbatan qo‘zg‘atilgan jinoyat ishlarini “ijobiy hal qilib berish”ni va’da qilib, katta miqdorda pul talab qilgan.

Tergov materiallariga ko‘ra, Shayxontohur tumani IIB FMB Tezkor-qidiruv xizmati Jinoyat qidiruv bo‘limi boshlig‘i o‘zining mansabdor tanishlari orqali ta’sir o‘tkazishini aytib, tadbirkordan jami 7,5 ming AQSH dollari talab qilgan. Bu mablag‘ning 7 ming dollari firibgarlik bo‘yicha qo‘zg‘atilgan jinoyat ishini ijobiy hal qilish, yana 500 dollari esa restorandagi yong‘in oqibatida ishchi jarohatlangani yuzasidan qo‘zg‘atilgan boshqa jinoyat ishini tugatib berish uchun so‘ralgan.

Davlat xavfsizlik xizmati, IIV Shaxsiy xavfsizlik bosh boshqarmasi hamda Toshkent shahar prokuraturasi hamkorligida o‘tkazilgan tezkor tadbir chog‘ida mansabdor shaxs oldidan 2,5 ming AQSH dollarini olgan vaqtida ashyoviy dalillar bilan ushlangan.Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari davom etmoqda. Vakolatli idoralar fuqarolarni pora talab qilish, xizmat vakolatini suiiste’mol qilish yoki boshqa korrupsiyaviy holatlarga duch kelgan taqdirda huquqni muhofaza qiluvchi organlarga murojaat qilishga chaqirmoqda.

Mutasaddilar ta’kidlashicha, korrupsiyaga qarshi kurashish davlat siyosatining ustuvor yo‘nalishlaridan biri bo‘lib, mansab mavqeidan shaxsiy manfaat yo‘lida foydalanishga nisbatan murosasiz choralar ko‘rilmoqda. Tergov yakunlariga ko‘ra, mazkur ish bo‘yicha huquqiy baho sud tomonidan beriladi.