Toshkent va Samarqand viloyatlarida o‘tkazilgan tezkor tadbirlar davomida yirik miqdordagi giyohvandlik vositalari musodara qilinib, bir necha nafar gumonlanuvchi qo‘lga olindi. Ma’lum qilinishicha, Davlat xavfsizlik xizmati va Bojxona idoralari hamkorligida Toshkent viloyatining Bekobod shahrida o‘tkazilgan operatsiyada 2025-yildan buyon qidiruvda bo‘lgan 1992-yilda tug‘ilgan shaxs ushlangan. U ijaraga olgan xonadon ko‘zdan kechirilganda, oshxonadagi muzlatgich ichida 151 gramm “opiy”, hojatxona shaxtasiga yashirilgan holda esa 4 kilogramm 971 gramm “gashish” aniqlangan.       

Dastlabki ma’lumotlarga ko‘ra, ushbu narkotik moddalar qo‘shni davlatdan kontrabanda yo‘li bilan olib kirilgan. Shuningdek, Samarqand viloyatining Urgut tumanida Davlat xavfsizlik xizmati, Chegara qo‘shinlari va ichki ishlar organlari tomonidan o‘tkazilgan tezkor tadbirda 2003-yilda tug‘ilgan ikki nafar shaxs shartli xaridorga 932 gramm “gashish” va 2,5 gramm “opiy”ni 10 ming AQSH dollariga sotish vaqtida ashyoviy dalillar bilan ushlangan. Har ikki holat yuzasidan jinoyat ishlari qo‘zg‘atilib, gumonlanuvchilarga nisbatan qamoq ehtiyot chorasi qo‘llangan. Ayni paytda huquqni muhofaza qiluvchi organlar tomonidan tergov harakatlari davom ettirilmoqda.