Тошкент шаҳар ИИББ берган маълумотга кўра, “Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида”ги Президент қарори билан автомототранспорт воситалари ва шаҳар электр транспорти воситалари ҳайдовчиларини тайёрлаш, қайта тайёрлаш ва уларнинг малакасини ошириш бўйича нодавлат таълим хизматлари кўрсатиш фаолияти учун лицензияга эга тадбиркорлик субъектларига барча тоифадаги автомототранспорт воситаларини (троллейбус ва трамвайдан ташқари) бошқариш ҳуқуқини берувчи ҳайдовчилик гувоҳномасини олиш учун назарий ва амалий имтиҳонларни ўтказиш ҳуқуқи берилган.

Шунингдек, Ҳукуматнинг 272-сонли “Автомототранспорт воситаларини бошқариш ҳуқуқини берувчи ҳайдовчилик гувоҳномаларини олиш учун имтиҳонларни ўтказиш соҳасига хусусий секторни жалб этишга доир қўшимча чора-тадбирлар тўғрисида”ги қарори тасдиқланган.

Ушбу қарорларга мувофиқ Тошкент шаҳар Сирғали туманида “Тошкент имтиҳон маркази” барпо этилган. Ушбу марказ жорий йилнинг 4 февраль кунидан ўз фаолиятини бошлайди.

“Тошкент имтиҳон маркази” ўз фаолиятини бошлаганлиги муносабати билан Вазирлар Маҳкамасининг қарорига асосан жорий йилнинг 4 февралидан Тошкент шаҳар ИИББ ЙҲХБ Рўйхатлаш ва имтиҳон олиш бўлим-бўлинмалари ҳайдовчилик гувоҳномасини бериш учун назарий ва амалий имтиҳонларни қабул қилиш фаолиятини тўхтатади.

Шунга мувофиқ эндиликда фуқаролар томонидан Тошкент шаҳрида ҳайдовчилик гувоҳномасини олиш ёки уни тиклаш учун имтиҳонларни топшириш Сирғали туманида жойлашаган “Тошкент имтиҳон маркази” томонидан амалга оширилиши маълум қилинди.

• Тошкент
• ЙҲХББ
• хабар