Маълум бўлишича, андижонлик фуқаро иш вақтида вафот этган. Энди ходимнинг оила аъзоларига 485,7 миллион сўм маблағ тўлаб бериладиган бўлди. Бу ҳақда, Бандлик вазирлиги маълум қилмоқда.

Хабар берилишича, Андижонлик Ш.Нуриллаеванинг турмуш ўртоғи Н.Нуриллаев меҳнат вазифаларини бажараётган вақтда тан жароҳати олиб вафот этган. Бахтсиз ҳодисадан сўнг, Ш.Нуриллаева боқувчисини йўқотганлиги учун корхона томонидан тўланиши лозим бўлган бир марталик нафақа ҳамда ойма-ой зарар тўловларини ундиришда амалий ёрдам сўраб Андижон вилояти Камбағалликни қисқартириш ва бандлик бошқармасига мурожаат қилган.

Шундан сўнг, вилоят Камбағалликни қисқартириш ва бандлик бош бошқармаси Давлат меҳнат инспекцияси томонидан фуқаронинг мурожаати белгиланган тартибда ўрганиб чиқилиб судга даъво аризаси киритилган.

Ҳозирда ушбу ариза қаноатлантирилиб суднинг ҳал қилув қарорига асосан Ш.Нуриллаева фойдасига 485 миллион 760 минг сўм миқдоридаги пул маблағларини ундириш белгиланди.

• Андижон
• Bandlik