Нурсултон Назарбоев Қозоғистоннинг ҳукмрон партияси бўлмиш "Нур Отан" нинг раислигини ҳозирги президент Тўқаевга бўшатиб берди. Бу ҳақда унинг матбуот котиби Айдос Укибай ўзининг Твиттер саҳифасида маълум қилди. 

81 ёшли Назарбоев Партия сиёсий кенгашининг кенгайтирилган йиғилишида "Нур Отан"га амалдаги президент Қосим-Жўмарт Тўқаев раҳбарлик қилиши зарурлигини маълум қилган. Бу партияни у 1999 йилдан бери бошқариб келаётган эди. Партиянинг янги етакчиси сайлангунига қадар, ҳозирча Назарбоев бу мавқени ўзида сақлаб туради.

Айдос Укибайнинг таъкидлашича, Назарбоевнинг бу қарори 2019 йилда бошланган ҳокимиятни топшириш жараёнининг узвий давомидир. "Нурсултон Назарбоевнинг фикрича, "Нур Отан" пандемия сабабли юзага келган инқироз вақтида Қозоғистон президентининг асосий таянчи бўлиши керак"  – дея вазиятга изоҳ берган Айдос Укибай.

Маълумот учун, Нурсултон Назарбоев қарийб 30 йил давомида Қозоғистонни бошқарган. 2019 йилнинг март ойида эса у президентлик лавозимидан истеъфо берганди, аммо ўшанда у ўзида "Нур Отан" партияси ва Қозоғистон Хавфсизлик кенгаши раиси лавозимларини сақлаб қолганди.

• Президент
• Қозоғистон