Ўзбекистон, Афғонистон ва Покистон ўртасида транспорт-логистика соҳасидаги ҳамкорликни ривожлантириш масалалари бўйича Термиз шаҳрида бўлиб ўтган уч томонлама ишчи гуруҳ учрашувида ташувчилар ва хусусий сектор вакиллари ўртасида ҳамкорликни йўлга қўйиш юзасидан В2В/G2G учрашувлари ўтказилди.

Транспорт вазирлиги Матбуот хизмати берган маълумотга кўра, мазкур учрашувлар якунида Покистон ва Афғонистоннинг 7 та компанияси билан ўзаро  ҳамкорлик тўғрисида меморандум ва келишувлар имзоланди. 

Шунингдек, тадбир иштирокчилари “Termiz Cargo Centre” халқаро логистика маркази ҳамда “Айритом” чегара-божхона постида ташқи иқтисодий фаолият қатнашчиларига экспорт-импорт операцияларини амалга оширишда яратилган шарт-шароитлар билан яқиндан тинишишди.

Қайд этилишича, уч томонлама саъй-ҳаракатлар натижасида Покистондан Афғонистон орқали Ўзбекистонга автомобиль транспортида халқаро юк ташувларини ташкил этиш бўйича олиб борилаётган ишлар самараси ўлароқ, бугун ушбу транспорт коридорининг тўлақонли фаолият юритиши, юкларнинг қисқа фурсатларда, хавфсиз равишда белгиланган манзилига етказилиши таъминланмоқда.

Вазирликнинг таъкилашича, айни пайтда миллий ташувчилар ҳам ушбу коридордан фойдаланишни бошлашган.

Жорий йил 27 март куни мазкур тадбирлар доирасида Покистондан юк олиб келаётган миллий юк ташувчиларимизнинг транспорт воситаси тантанали равишда кутиб олинди.

• Афғонистон
• Логистика
• Покистон
• Transport