Ўтган давр мобайнида, Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан берилган топшириқ ижроси юзасидан, ҳуқуқни муҳофаза қилувчи органлар билан биргаликда, давлат буюртмачиларининг 2022 йилда 37 млрд сўмлик 142 та энг яхши таклифларни танлаш бўйича ўтказилган танлов савдолари назорат тартибида ўрганилган.

Ўтказилган ўрганишлар давомида, 86 та ҳолатда 19 млрд сўмлик қонун бузилишлар (5 та ҳолатда иштирокчилар ўртасида аффилланганлик ҳолатлари мавжудлиги, 48 та ҳолатда савдолар ўтказишнинг қонун ҳужжатларида белгиланган тартибини бузиш, 33 та ҳолатда савдоларнинг битта ёки бир нечта иштирокчисига савдоларда қатнашиш учун имтиёзли шарт-шароитлар яратиб бериш ҳолатлари) аниқланган.

Жумладан, Сирдарё туманидаги «Мурувват» ногиронлиги бўлган аёллар интернат уйи томонидан ўтказилган танлов савдоларининг 1 тасида иштирокчилар ўртасида аффилланганлик ҳолатлари мавжудлиги аниқланган бўлиб, қонунбузилиш ҳолатлари юзасидан тузилган 317 млн сўмлик шартнома ҳақиқий эмас деб топилиб, бекор қилинган ҳамда қонунбузилиш ҳолатларига йўл қўйганлиги учун масъул ходимларга нисбатан суд томонидан маъмурий жавобгарлик чораси қўлланилган.

Ширин шаҳар ва Боёвут туман Тиббиёт бирлашмалари томонидан умумий қиймати 365 млн сўмлик 9 та танлаш савдосида «Давлат харидлари тўғрисида»ги ва «Рақобат тўғрисида»ги Қонунлар талаблари бузилиши ҳолатлари аниқланиб, масъул ходимларга нисбатан маъмурий жавобгарлик чораси қўллаш учун ҳужжатлар судга юборилган.

Сирдарё вилояти Халқ таълими бошқармасига қарашли 70-сонли мактаб интернати томонидан умумий қиймати 610 млн сўмлик «Аутсорсинг» хизмати учун ўтказилган танлаш савдоларида «Давлат харидлари тўғрисида»ги ва «Рақобат тўғрисида»ги Қонунлар талаблари бузилиши ҳолатлари аниқланиб, тузилган шартномани бекор қилиш бўйича бажарилиши мажбурий бўлган кўрсатма берилган.

Бундан ташқари, 17 млрд сўмлик 63 та қонунбузилиш ҳолатлари юзасидан тўпланган ҳужжатлар прокуратура органларига ҳуқуқий баҳо бериш учун тақдим этилган.

Қонунбузилиш ҳолатлари юзасидан Ҳудудий бошқарманинг махсус комиссияси томонидан белгиланган тартибда иш қўзғатилиб, ҳолатлар бўйича ҳужжатлар маъмурий жавобгарлик бўйича суд органларига юборилган.

• Қўмита
• Тендер