АҚШ президенти Доналд Трамп маъмурияти 6 ноябрь куни янги кўрсатма эълон қилди. Унга кўра, эндиликда айрим соғлиғида муаммоси бўлган иммигрантларга виза бериш тўхтатилиши мумкин. Бу ҳақда CBS News хабар берди.

Маълумотларга кўра, АҚШ Давлат департаменти элчихона ва консулликларга кўрсатма юборган. Ушбу ҳужжатда юрак ва респиратор касалликларга чалинганлар, шунингдек, саратон, диабет, руҳий касаллик ёки ортиқча вазнга эга бўлганлар “мамлакат учун иқтисодий юк бўлиши” мумкинлиги сабабли виза олишдан четлатилиши мумкинлиги ёзилган.

Бу қарор Трамп маъмуриятининг муҳожирлик сиёсатини янада қатъийлаштириш йўлидаги навбатдаги қадами сифатида баҳоланмоқда. У 2025 йил давомида ноқонуний муҳожирларни депортация қилиш, айрим давлатлардан келганларга бошпана бермаслик ва АҚШга кириш квоталарини кескин камайтириш ташаббусларини илгари суриб келмоқда.

Янги қоидалар деярли барча виза аризачиларига тааллуқли бўлади, аммо асосан АҚШда доимий яшашни истаганларга нисбатан қўлланади. Эндиликда виза бериш жараёнида номзоднинг соғлиги, моддий имконияти ва оилавий ҳолати батафсил ўрганилади.

Мутахассислар бу кўрсатмалар тиббий тайёргарлиги бўлмаган виза ходимларига катта ваколат беришини танқид қилмоқда. Уларнинг фикрича, бундай ходимлар шахснинг касалликлари асосида келажакдаги тиббий харажатларни тахмин қилиб, нотўғри қарорлар чиқариши мумкин.

АҚШда виза олиш жараёнида аввалдан тиббий кўрик ўтказилиши шарт эди, лекин янги тартиб бу жараённи янада кескинлаштиради — сурункали касалликлар, руҳий ҳолат ва даволаниш харажатлари ҳам энди ҳисобга олинади.

• АҚШ
• Миграция
• тақиқ