“АҚШ иммиграция ва божхона полицияси (ИCЕ) якшанба куни АҚШ маъмуриятининг ноқонуний миграцияга қарши чоралари доирасида 1179 кишини ҳибсга олди”, – деб хабар бермоқда NBC телеканали.

Шундан 566 нафар маҳбус АҚШ чегарасини ноқонуний кесиб ўтганликда айбланган.

Телеканалнинг таъкидлашича, АҚШ маъмурияти илгари оғир жиноят содир этган ноқонуний муҳожирларни ҳибсга олиш ва депортация қилишга кўпроқ аҳамият бермоқда.

Аввалроқ, Доналд Трамп расмийларга ноқонуний муҳожирларнинг мамлакатнинг жанубий чегарасини кесиб ўтишига қарши чоралар кўриш тўғрисидаги фармонни имзолаган эди. Шунингдек, у 21 январь куни АҚШнинг жанубий чегарасида фавқулодда ҳолат эълон қилиш тўғрисидаги фармонни ҳам имзолаган.

Яқин вақт оралиғида камида 10 минг америкалик ҳарбий хизматчи ва кўплаб зирҳли транспорт воситалари чегарага юборилиши кутилмоқда. Олдинроқ эса Мексика чегарасига 1,5 минг ҳарбий хизматчи юборилган эди.

Эслатиб ўтамиз, ўтган ҳафтада АҚШ ҳукумати Мексика ва Гватемалага ҳарбий самолётлар ёрдамида ноқонуний муҳожирларни депортация қилишни бошлаган эди.

• АҚШ
• Трамп
• муҳожир