Дунё тарихида давлатларнинг иқтисодий таназзулга учраши ёки инфляция ҳолатлари кўп бор юз берган. Худди шундай, бу каби ҳолатлар ҳозирги кунда ҳам турли мамлакатларда турли даражада рўй бермоқда. Пулнинг қадрсизланиши, айнан ҳозирги халқаро вазият фонида яна долзарб мавзуга айланмоқда.

Ҳозирда рўй бераётган инқироз таъсирида бир қатор мамлакатларда инфляция кучайиб бормоқда. Мисол учун, май ойида Ўзбекистонда йиллик инфляция даражаси 11% га етди.

БМТ иқтисодчиларининг прогнозига кўра, 2022 йилда ҳаттоки АҚШ долларининг инфляция даражаси ҳам 6,7% ни ташкил қилиши кутилмоқда. Бу АҚШда сўнгги 40 йил ичида кузатилган энг юқори инфляция кўрсаткичи ҳисобланади.

АҚШ озиқ-овқат дўконларида нархларнинг ошиши америкаликлар 1970 йиллардаги инқироздан бери кўрмаган даражада тезлашди.

2021 йилнинг майидан 2022 йилнинг майигача кўплаб маҳсулот тоифалари бўйича инфлясия 12 фоизни ташкил этди, деб ёзади CNN ахборот агентлиги, мамлакат Меҳнат вазирлиги маълумотларига таяниб.

Нархларнинг энг тез кўтарилаётгани асосий товарлардир, дея қайд этади телеканал. Тухум таннархи ҳудди шу 12 ойда 32,2 фоизга, парранда ва балиқ маҳсулотлари эса 14,2 фоизга ва сут 11,8 фоизга ошди.

Мақолада айтилишича, инфляция маълумотлари истеъмолчилар учун “уч карра зарба” бўлди. Нархларнинг кескин сакраши нафақат озиқ-овқат, балки уй-жой ва электр энергияси учун ҳам қайд этилган.

АҚШда кузатилаётган ушбу вазиятга мамлакат фуқаролари ва экспертлар президент Жо Байденни сабабчи қилиб кўрсатишмоқда. Ҳатто АҚШнинг “New York Post” нашри бу ҳақда “bidenflation” яъни “байденинг инфляцияси” сарлавҳаси остида мақола ҳам чоп этди. 

Президент Байден эса мамлакат иқтисодиётида кузатилаётган инфляция унинг “рағбатлантирувчи” сарф-харажатларини кучайтирганлиги ҳақидаги танқидни рад этиб, бунда Россия президенти Владимир Путиннинг бензин нархларини ошириб юборганлигини сабаб қилиб кўрсатган.

Нима ҳам дердик, мамлакат иқтисодиётидаги инфляцияга ким ёки нима сабаблигини вақт кўрсатади.

• АҚШ
• Байден
• Инфляция
• Жаҳон
• Журналистика
• Таҳлил