Бухоро, Сурхондарё вилоятлари ва Қорақалпоғистон Республикасида чиқинди ёқиш заводлари қурилишига тамал тоши қўйилди. Бу ҳақда Чиқиндиларни бошқариш агентлиги матбуот хизмати хабар берди.

Чиқиндиларни қайта ишлаш ва улардан энергия манбаи олишга асосланган замонавий лойиҳаларни амалга ошириш бўйича Ўзбекистон президентининг тегишли топшириғига мувофиқ, Чиқиндиларни бошқариш ва циркуляр иқтисодиётни ривожлантириш агентлиги директори ҳамда Хитойнинг Wangneng Environment ва CSET етакчи компаниялари раҳбарлари ўртасида чиқиндиларни етказиб бериш битими имзоланган.

Унга кўра:

Бухоро вилоятида Wangneng Environment компанияси иштирокида 165 млн АҚШ доллари миқдорида тўғридан-тўғри хорижий инвестиция ҳисобига Когон тумани “Гулистон” МФЙ ҳудудида йилига 547,5 минг тонна қаттиқ маиший чиқиндиларни қайта ишлаб, натижада соатига 230 млн кВт электр энергияси ишлаб чиқариш қувватига эга бўлган завод қурилади. Лойиҳа ишга туширилганда қўшимча 150 та янги иш ўрни яратилади.

Сурхондарё вилоятида — CSET компанияси иштирокида умумий қиймати 150 миллион АҚШ доллари миқдоридаги тўғридан-тўғри хорижий инвестиция ҳисобига Ангор тумани “Баҳор” МФЙ ҳудудида йилига 438 минг тонна қаттиқ маиший чиқиндиларни қайта ишлаб, натижада соатига 75 млн кВт электр энергияси ишлаб чиқариш қувватига эга бўлган завод қурилади. Лойиҳа ишга туширилганда қўшимча 150 та янги иш ўрни яратилади.

Ушбу заводлар 2028 йилда ишга туширилиши режалаштирилган бўлиб, корхоналар 30 йил давомида фаолият юритади.

Қорақалпоғистон Республикасида CSET компанияси иштирокида умумий қиймати 80 миллион АҚШ доллари миқдоридаги тўғридан-тўғри хорижий инвестиция ҳисобига Нукус тумани ҳудудида йилига 274 минг тонна қаттиқ маиший чиқиндиларни қайта ишлаб, натижада соатига 80 млн кВт электр энергияси ишлаб чиқариш қувватига эга бўлган завод қурилади. Лойиҳа ишга туширилганда қўшимча 100 та янги иш ўрни яратилади.

Бу каби заводлар айни пайтда республиканинг 6 та ҳудуди — Тошкент, Андижон, Наманган, Фарғона, Қашқадарё, Самарқанд вилоятларида қурилиши давом этмоқда.

“Чиқиндилар тўғри тўпланиб, кўпроқ қайта ишланса, экологик мувозанат яхшиланади, табиат тоза бўлади, жамият ўзгаради”, деган эди президент Шавкат Мирзиёев маиший чиқиндиларни қайта ишлаш, улардан электр энергияси ва маҳсулот ишлаб чиқариш лойиҳалари тақдимоти билан танишганда.

​Ўзбекистонда йилига 14 миллион тонна чиқиндилар ҳосил бўлади, лекин уларнинг атиги 4-5 фоизи қайта ишланади. Чиқинди полигонларидан 7 миллион тоннадан зиёд иссиқхона газлари атмосферага чиқади, 43 минг тонна заҳарли фильтратлар ер остига сингади. Чиқиндиларни қайта ишлаш орқали ҳам унинг табиатга таъсирини камайтириш, ҳам фойда олиш мумкин.

• Бухоро
• Чиқинди
• Қорақалпоғистон
• Сурхондарё
• zavod