Президент Шавкат Мирзиёев ташаббуслари асосида тадбиркорликни қўллаб-қувватлаш ва бизнес учун янада қулай муҳит яратишга қаратилган янги чоралар тақдим этилди.

Янги ўзгаришларга кўра, 2026 йил 1 июндан кичик бизнес учун соддалаштирилган солиқ режими чегараси 1 миллиард сўмдан 5 миллиард сўмгача оширилиши кутилмоқда.

Бу эса тадбиркорларга фаолиятини кенгайтириш, ортиқча солиқ босимини камайтириш ва бизнесни қонуний равишда ривожлантириш имконини беради.

Шунингдек, янги тартиблар доирасида:

• умумий овқатланиш, савдо ва хизмат кўрсатиш соҳалари учун 6 фоизлик соддалаштирилган ҚҚС тизими жорий этилади;
• паст хавфли тадбиркорлар учун ҚҚСни қайтариш жараёни автоматлаштирилади;
• ҚҚС гувоҳномасини вақтинча тўхтатиш амалиёти бекор қилинади;
• солиқ аудити ва сайёр текширувларга чекловлар киритилади;
• банк ҳисобварақлари очиш ва айрим хизматлар тўлиқ рақамлаштирилади.

Мазкур енгилликлар 600 мингдан ортиқ кичик бизнес субъектига фаолиятини очиқ ва эркин ривожлантириш имконини яратиши кутилмоқда.