“Вудс-Хоул” Океанография институти Атлантика океанида чўкиб кетган “Титаник” лайнерининг илгари эълон қилинмаган кадрлари акс этган видеони эълон қилди. Ушбу видео Жеймс Кемероннинг шу номдаги филми суратга олинганининг 25 йиллигига тўғри келди.

Кадрлар 1986 йил июль ойида Океанография институти тадқиқотчилари томонидан олинган. Улар Алвин бошқариладиган сув ости кемаси ва масофадан бошқариладиган Жейсон Жуниор модулининг камераларидан фойдаланган.

Видеода кема қопламасининг кўплаб элементларини ва унинг юқори палубаси, шунингдек, декор ва ички безатишнинг баъзи элементларини кўриш мумкин. Тасвирнинг сифати анча паст, аммо суратга олиш йили ва шарт-шароитларни ҳисобга олиш керак – “Титаник”нинг вайроналари 3750 метр чуқурликда жойлашган.

Лайнер 1912 йил 14 апрелдан 15 апрелга ўтар кечаси Саутгэмптон портидан Ню-Йорк шаҳрига илк саёҳатида айсберг билан тўқнашиб кетганидан сўнг чўкиб кетган. Ушбу бахтсиз ҳодиса 1496 кишининг ҳаётига зомин бўлган. “Титаник”нинг қолдиқлари 1985 йил сентябрга қадар топилмаган.

Аввалроқ, олимлар 110 йил аввал чўкиб кетган “Титаник”дан юқори сифатли ноёб кадрларни суратга олишга муваффақ бўлган эди.

Қайд этиш мумкин, “Титаник” 1997 йилда режиссёр Жеймс Кемерон томонидан суратга олинган, афсонавий Титаник лайнерининг чўкиши тасвирланган америка фильми. Турли ижтимоий қатламлар вакиллари бўлган филм қаҳрамонлари 1912 йилда Атлантика океани бўйлаб биринчи ва охирги саёҳатини амалга оширган лайнер бортида бир-бирларини севиб қолишади. Бош ролларни Леонардо Ди Каприо ва Кейт Уинслет ижро этган.

Лойиҳа бюджети 200 миллион АҚШ долларини ташкил этган ва бу ўз даври учун рекорд суммадир. “Титаник” 1 миллиард долларлик маррани босиб ўтган биринчи, 2 миллиард долларлик маррани босиб ўтган иккинчи фильм ҳисобланади. У дунё бўйлаб 2,2 миллиард доллардан ортиқ даромад келтирган.

“Титаник” фильми умумий ҳисобда 87 та мукофотга муносиб деб топилган. Уларнинг 11 таси нуфузли "Оскар" мукофоти ҳисобланади.

• Titanik
• голливуд