Айрим одамлар ойлик маошини қўлга киритган заҳоти турли харидларга, дам олишга сарфлаб қўйиб, кейинги маошгача иқтисод режимида кун кўра бошлайди. Бундай бўлмаслиги учун харажатларнинг, дам олишга ажратиладиган пул миқдорининг меъёрдан ошиб кетмаслигини назорат қилиш жуда ҳам муҳим ҳисобланади. Эҳтимол, дам олишнинг нисбатан арзонроқ бўлган муқобилларини танлашга ҳам тўғри келиши мумкин.

Нима қилиш зарур?

Мисол учун:

Кафеларга бирон бир сабабсиз кирмасликка ҳаракат қиламиз. У ерда нархлар анча баланд, кофе ёки пиццани уйда ҳам истеъмол қилиш мумкин.

Кинотеатрларнинг кечки сеанслари қимматроқ туради. Сеансларга эса попкорн, ёнғоқ олиб кирамиз. Бу харажатларни кўпайтириб юборади. Агар шу фильмни кўришни жуда ҳам истасангиз эрталабки вақтларда киринг.

Худди шу фикрни тунги клублар, дискотекалар ва бошқа дам олиш масканлари ҳақида ҳам айтиш мумкин. Уларнинг кириш чипталари нафақат жуда қиммат, балки ичимликларининг нархи ҳам ҳаддан ташқари баланд. Бундай дам олишлардан воз кечган афзал эмасми?

Кўнгилочар, дам олиш масканларига киришда акция ва чегирмалардан фойдаланинг. Ҳатто, кафеларда ҳам промокоддан фойдаланган ҳолда ярим баҳосини тўлаб, овқатланиш мумкин.

Агар айни пайтда жуда ҳам зарур бўлмаса, дизайнерлик маҳсулотларидан ҳам воз кечган маъқул. Дўконлардан сотиб олинган кўйлак қимматбаҳосидан мутлақо фарқ қилмаслиги мумкин.

Спортзалга кириш учун қиммат абонементдан воз кечиб, бир марталик машғулотларга қатнанг. Кино ёки театрни эса уйда, онлайн режимида ҳам томоша қилиш мумкин. Бу анча арзон, саҳнада томоша қилгандагидан фарқи йўқ.

Тўғри, ҳаёт зерикарли бўлиб қолмаслиги учун дам олиш турларининг барчасидан бирданига воз кечиб бўлмайди. Ойда 1, 2 марта сайрга чиқиш ёки туғилган кунларни ресторанда нишонлаш мумкин. Бу нафақат пулингизни тежайди, балки ҳар жиҳатдан ёқимли ҳам бўлади. Икки карра фойдага эга бўласиз.

Агар савдо марказларини айланмоқчи бўлсангиз, буни ҳам иқтисод нуқтаи-назаридан амалга оширинг. Фақат зарур нарсалар учун расталарни айланишни одатга айлантиринг. Ҳар нарса учун бекордан бекорга пул сарфлашнинг нима кераги бор? Савдо марказларига борганда кредит карталарини уйда қолдиринг. Дўкондаги товарларнинг нархини эса сайтлардаги нархлар билан солиштириб олинг. Дўконда кийиб кўрган кўйлагингизни, агар арзонроқ бўлса, сайт орқали буюртма қилишингизга ҳеч ким монелик қилмайди.

Дуч келган нарсани харид қилавериш яхши эмас. Нарсани сал четга суриб қўйиб, яхшироқ таклиф берувчиларни излаш керак. Савдо марказларига болалар билан бирга бормаган яхшироқ. Турли егуликларни сўрашса майли, бироқ мўлжалда йўқ нарсани олиб берасан, деб хархаша қилишлари бор гап. Қолаверса, зарур нарсани харид қилиш учун камроқ вақт сарфлашимиз аниқ.

Иқтисод режимида зерикиш бўлмайди

Ҳаёт бутунлай зерикарли бўлиб қолмаслиги учун ҳамёнга зарар қилмайдиган йўлларини излаш керак. Масалан, шаҳар бўйлаб пиёда сайр қилиш, парк ёки ҳайвонот боғига бориш мумкин. Дам олиш кунлари шаҳардан ташқарига чиқиб, табиат гўзалликларидан баҳра олган ҳам яхши. Бу анча арзонга тушади. Таассуротлар янада ёрқинроқ бўлиши учун суратга олинг. Харажатларни кўпайтирмасдан туриб, ҳаётни гўзаллаштириш унча қийин эмас. Сал жиддийроқ фикр қилинса, бундан ҳам зўр вариантларни топиш мумкин.

• Фойдали
• қизиқарли