Xabardor.uz’нинг “Interview” дастурининг навбатдаги меҳмони машҳур блогер – Instagram тармоғида dili.me тахаллуси билан машҳур “котта бола” – Дилшод Назаров.

– Ассалому алайкум, Дилшоджон. Қимматли вақтингизни аямай ташриф буюрганиз учун катта раҳмат.

Ҳозирги кунда сизни ижтимоий тармоқлар орқали танимаган одам кам бўлса керак. Шундай бўлсада дастуримизнинг биринчи анъанавий саволи билан мурожаат қиламан: “dili.me” ким ва оилангиз ҳақида ҳам қисқача тўхталиб ўтсангиз...

– Менинг исми-шарифим – Дилшод Назаров. Оилада 6 кишимиз. Ота-онам, опам, мен, синглим ва укам. Олий таълимда таҳсил олмаганман, ўрта мактабни битирганман. Ҳозирда блогерлик билан шуғулланаман.

– Нима учун айнан шу соҳадасиз? Ёки блогерлик (вайнерлик), ижтимоий тармоқларда танилиш ортидан ҳам даромад қилиш мумкинлиги учунми?

– Тўғрисини айтсам, бу соҳада даромад борлиги ҳақида билмаганман. Бу соҳага кириб келишимдан мақсад эса – мен санъатни яхши кўраман. Эстрада ва цирк коллежининг актёрлик маҳорати йўналишида таҳсил олганман. Ҳар доим хаёлимда қачондир барибир актёр бўламан, деган фикр бўларди. Орадан 2-3 йил ўтиб, карантин туфайли тасодифан кичик видеолар қилиб ижтимоий тармоқларга жойладик. Шундан сўнг машҳурликка эриша бошладим.

– Бундан аввал берган интервюларингиздан бирида “мен ҳозирги кундаги “топовый” блогерларга ҳавас қилиб бу соҳага кириб келганман” деган экансиз. Хўш, улар билан таққослаганда ҳозир сизнинг ўрнингиз қаерда?

– Албатта улардан кейинги ўринда. Чунки улар фаолиятларини мендан анча аввал бошлашган. Менимча, бу саволингизга жавобни обуначилардан сўраш керак.

– Ҳали ҳам ижодингиз давомида босимлар ёки тайёрлаган вайнларингиз кимгадир тегиб кетиб, аккаунтингиздан шу видеони олиб ташлашингизни сўраш ҳолатлари бўлиб турадими?

– Бундай ҳолатлар кўп бўлади. Биласизми, видеоларимиз асосан актуал мавзуларни қамраб олади ёки халқимиз орасидаги жайдари гаплар ва интернет оламидаги машҳур фразалар асосида тайёрланади. Балки шу мавзулар кимгадир “тегиб” кетса керак.

– 3 йил олий таълимга ўқишга топшириб кира олмай, ҳозирги кунда ҳаётда ўз ўрнингизни топиб олдингиз дейиш мумкин. Тўғрими? Ана шундай ўқишга кира олмай, тушкунликка тушиб юрган тенгдошларингиз учун нима маслаҳат ёки мотивация бера оласиз?

– Ёшларга айтадиган талайгина гапларим бор. Ҳар йили ОТМ тест жавоблари чиққандан кейин видео тайёрлаймиз. Ўқишга кира олмадингизми, сиқилманг. Келажакда сизларни буюк ишлар кутмоқда. Мен ҳам уч йил олий таълимга имтиҳон топшириб, кира олмаганман. Ҳамма нарсада бир ҳикмат бор.

– Қачондир – кун келиб сиз ҳозир шуғулланаётган соҳангиз якунига етиши ва бошқа сферада тирикчилик қилишингизга тўғри келиши ҳақида ўйлайсизми?

– Бизнес билан шуғуллансам керак. Сериал ва кино соҳасида ҳам омадимни синаб кўраман.

– Мароқли суҳбат учун раҳмат.

Олимжон Ҳасанов суҳбатлашди

• Instagram
• Маданият
• Вайнер
• қизиқарли