Тошкентда БМW автомобилида ЙПХ инспекторини уриб юбориб, унинг ўлимига сабаб бўлган вояга етмаган Д.Т.га 2 йил 4 ой муддатга озодликдан маҳрум қилиш жазоси тайинланганди. Ҳукм жамоатчилик орасида турли муҳокамаларга сабаб бўлгач, Тошкент шаҳар судлари ҳолат юзасидан изоҳ берди.

Судлар матбуот хизматининг маълум қилишича, вояга етмаганлар томонидан содир этилган жиноятлар бўйича ишларни кўриб чиқиш ва уларга жазо тайинлаш қонунчиликда алоҳида тартибга солинган.

Жумладан, вояга етмаганларга оид жиноят ишлари ёпиқ суд мажлисларида кўрилади. Уларга озодликдан маҳрум қилиш жазоси Жиноят кодексининг 85-моддасида белгиланган тартибда тайинланади. Бундай жазо умумий тартибдаги колонияларда эмас, балки тарбия колонияларида ўталади.

Судлар изоҳида қайд этилишича, мазкур нормалар вояга етмаганларнинг руҳий, физиологик ва ижтимоий жиҳатдан ҳали тўлиқ шаклланмаганлиги билан боғлиқ. Бунда жазодан асосий мақсад шахсни жазолаш эмас, балки уни қайта тарбиялаш ва жамиятга мослаштириш ҳисобланади.

Суднинг таъкидлашича, Д.Т. жиноят содир этган пайтда 16 ёшга тўлмаган ва мактаб ўқувчиси бўлган. Унга жазо тайинлашда унинг ёши, ахлоқан тузалиши, қайта тарбияланиши ҳамда келгусида янги жиноятлар содир этишининг олдини олиш каби ҳолатлар ҳисобга олинган.

«Марҳумларни ҳаётга қайтариб бўлмайди. Шу нуқтайи назардан, жамоатчиликнинг эҳтиросли муносабатларига тушуниш билан қаралади. Бироқ суд томонидан босиқлик ва жиноят иши бўйича ҳар бир ҳолат чуқур таҳлил қилинган ҳолда тўхтамга келиниши лозим», — дейилади расмий изоҳда.

Шунингдек, судлар ҳукм ҳали қонуний кучга кирмаганини маълум қилди. Тарафлар ҳукм устидан шикоят бериш ҳуқуқига эга. Шикоят келиб тушган тақдирда, иш юқори суд инстансиясида белгиланган тартибда кўриб чиқилиб, унга ҳуқуқий баҳо берилади.