«Тошкент-АЭРО» ихтисослаштирилган божхона комплексида қиймати 1,3 миллиард сўмга яқин заргарлик буюмлари ва олтин қуймаларини яширинча олиб киришга уринган фуқаро ушланди. Бу ҳақда божхона комплекси матбуот хизмати хабар берди.

Қайд этилишича, фуқаро «Дубай–Тошкент» йўналиши бўйича Ўзбекистонга кириб келган. Унинг юклари божхона назоратидан ўтказилганда, декларатсияда кўрсатилмаган заргарлик буюмлари ва олтин қуймалари аниқланган.

Хусусан, юклар орасидан соф оғирлиги 921,37 грамм бўлган 141 дона заргарлик буюми ҳамда учта олтин қуйма топилган.

Экспертиза хулосасига кўра, аниқланган заргарлик буюмлари ва олтин қуймаларнинг умумий қиймати 1 миллиард 293 миллион сўмни ташкил этган.

Бундан ташқари, фуқаронинг юклари орасидан аксиз маркаларисиз 120 қути тамаки маҳсулоти ҳамда 90 дона никотинли снюс аниқланган.

Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Наманган аэропортида беш нафар фуқаронинг қиймати 1,1 миллиард сўмлик олтинни яширинча Ҳиндистонга олиб чиқишга урингани аниқланганди.