Жорий йил бойлар рейтингида кескин суръатда кўтарилган ҳиндистонлик магнат Гаутам Адани Жефф Безосни ортда қолдириб, дунёнинг иккинчи энг бой одамига айланди. Бу ҳақда “Bloomberg” хабар берди.

Йилни “Bloomberg” миллиардерлар индексида 14-ўринда бошлаган Аданининг бойлиги 146,9 миллиард долларга етди, бу Илон Маскнинг 260 миллиард доллар бойлигидан кейинги энг улкан миқдор.

“Adani Enterprises” компаниясининг акциялари шу ҳафта рекорд даражага кўтарилди.

Безоснинг бойлиги 145,8 миллиард долларга тушиб кетди. “Amazon” акциялари эса бу йил 26 фоиздан кўпроқ пасайган.

Адани феврал ойида Осиёнинг энг бой одами сифатида ватандоши Мукеш Амбанини ортда қолдирган, апрел ойида эса 100 миллиардлик довонни забт этди ва сўнгги икки ой ичида Билл Гейтс ва франциялик Бернар Арнодан ўзиб кетди.

Бу илк марта осиёлик миллиардернинг АҚШ технология тадбиркорлари ҳукмронлик қилган бойлик индексининг юқори поғонасига кўтарилганини англатади.

60 ёшли Адани 80 йилларнинг бошида Мумбай олмос саноатида ўз омадини синаб кўриш учун коллежни ташлаб кетган.

Шундан буён унинг конгломерати аэропортлар, маълумот марказлари, цемент, оммавий ахборот воситалари ва яшил энергиягача кенгайиб, бош вазир Нарендра Моди Ҳиндистоннинг узоқ муддатли иқтисодий мақсадларига эришиш учун муҳим, деб ҳисоблаган соҳаларга эътибор қаратди.

Мамлакатдаги энг йирик хусусий сектор порти ва аэропорт операторлари, шаҳар-газ дистрибюторлари ва кўмир ишлаб чиқарувчиси Адани империясининг бир қисми бўлиб, у ҳам дунёдаги энг йирик қайта тикланадиган энергия ишлаб чиқарувчиси бўлишни мақсад қилган.

• Bloomberg
• Gautam Adani
• Ilon_Mask
• миллиардерлар