Жанубий Африканинг жануби-шарқидаги КваЗулу-Натал провинсиясида сув тошқини қурбонлари сони 443 нафарга етди. Бу ҳақида “Reuters” ахборот агентлиги хабар берди. 

Маълум қилинишича, тошқинлар оқибатида 63 киши бедарак йўқолганлар рўйхатига киритилган.

“Ҳозирда қурбонлар сони 443 нафар, яна 63 нафари бедарак йўқолган”, дейилади маҳаллий eNCA телеканали томонидан эфирга узатилган брифингда. Хусусан, бир кун олдин расмийлар 398 киши ҳалок бўлганини қайд этишган. Энг кўп ўлим ҳолатлари (350 дан ортиқ) маъмурий маркази Дурбан шаҳри бўлган Итеквини муниципал округида тасдиқланган.

Таъкидлаш жоиз, ёмон об-ҳаво минглаб аҳолини уйсиз қолдирган, электр ва сув таъминоти узилган, Африканинг энг гавжум портларидан бири – Дурбаннинг фаолиятини вақтинча тўхтатилган. 

Антарктидадан келаётган совуқ ҳаво массалари таъсирида 8-апрелдан буён Жанубий Африкада циклон айланиб юрибди. КваЗулу-Натал бошқа вилоятларга қараганда кўпроқ зарар кўрган, бу ерда 4 мингта маъмурий бинолар ва уйлар бутунлай вайрон бўлган, Шунингдек, кўплаб автомобил ва темир йўллар сув остида қолган, кўприклар вайрон бўлган.

Маълумотларга кўра, тўфондан етказилган зарар 684,58 миллион АҚШ долларидан ошади.

• Жаҳон
• Janubiy Afrika
• сув_тошқини