Ўзбекистонда кузатилаётган аномал иссиқ муносабати билан Меҳнат инспекцияси очиқ ҳавода ишловчи ходимларни ҳимоя қилиш бўйича иш берувчилар бажариши шарт бўлган талабларни эълон қилди. Унга кўра, соат 11:00 дан 16:00 гача очиқ ҳаводаги ишларни қисқартириш ёки вақтинча тўхтатиш, оғир жисмоний меҳнатни чеклаш тавсия этилади.

Шунингдек, иш берувчилар ходимларни доимий равишда тоза ичимлик суви, сояли ёки совитиладиган дам олиш жойлари ҳамда иссиқдан ҳимоя қилувчи махсус кийимлар билан таъминлаши шарт. Бундан ташқари, иссиқ шароитда ишловчи ходимлар тиббий кўрикдан ўтган бўлиши, уларга иссиқ уришининг аломатлари тушунтирилиши ва зарурат туғилганда зудлик билан биринчи тиббий ёрдам кўрсатилиши лозим. Меҳнат инспекцияси ушбу талабларга риоя қилиш тавсия эмас, балки иш берувчининг қонуний мажбурияти эканини эслатди.