Украина Президенти Владимир Зеленский бир йил аввал тайинланган Бош вазир Юлия Свириденкони алмаштиришни режалаштираётганини маълум қилди. Бу ҳақда у Х ижтимоий тармоғидаги саҳифасида ёзди. Зеленский Свириденко ўрнига кимни Бош вазирликка тавсия қилиши ёки унинг ўзи қайси лавозимга ўтишини очиқламади. Шунингдек, у ҳуқуқни муҳофаза қилувчи органлар раҳбарлари ўртасида ҳам ўзгаришлар бўлишини билдириб, бу қарор “янгиланган сиёсий стратегия”ни амалга ошириш учун зарурлигини таъкидлади.

“Юлияга Бош вазир сифатидаги аниқ, барқарор ва самарали меҳнати, шунингдек, Украина жамоасидаги кўп йиллик хизматлари учун миннатдорлик билдираман. Мен унга асосий ҳамкорларимиздан бири билан муносабатларнинг янги ва муҳим йўналишига раҳбарлик қилишни таклиф қилдим”, — деб ёзди Зеленский. У, шунингдек, парламент билан ҳамкорликда ҳукумат таркибида тегишли ўзгаришлар амалга оширилишини кутаётганини билдирди.

Украина қонунчилигига кўра, Бош вазирнинг истеъфоси парламент томонидан тасдиқланиши керак. Бу эса бутун ҳукуматнинг истеъфога чиқишига олиб келади. Маҳаллий ОАВ ва парламент депутатлари эҳтимолий номзодлар қаторида собиқ Бош вазир ва амалдаги Энергетика вазири Денис Шмигал, Рақамли трансформатсия вазири Михайло Федоров ҳамда “Нафтогаз” компанияси раҳбари Сергей Коретский номларини тилга олмоқда. Маълумот учун, иқтисодчи Юлия Свириденко 2025-йил июль ойида Украина Бош вазири этиб тайинланган эди.