18 декабрь куни АОКА ҳамда Жиззах вилоят ҳокимлиги томонидан вилоят бўйлаб Республика ва маҳаллий ОАВ вакиллари учун пресс-тур ташкил этилди.

Дастлаб пресс-тур иштирокчилари яқинда ташкил этилган халқ депутатлари вилоят Кенгаши биносига ташриф буюриб, Кенгашда депутатлар учун яратилган қулайликлар билан танишдилар.

Жиззах вилояти Халқ депутатлари вилоят кенгаши котибияти мудираси Нодира Каримованинг таъкидлашича, котибият учун янги бинодан 3 та хона ажратилиб, замонавий компьютер ва жиҳозлар билан таъминланган, зарур шар-шароитлар яратилган.

2021 йилнинг январь-ноябройлари давомида халқ депутатлари вилоят Кенгашининг 13 та сессияси ўтказилиб, унда 220 та масалалар муҳокама қилинган.

Қайд этилишича, жорий йилда ҳудудни ижтимоий-иқтисодий ривожлантиришга қаратилган дастурларнинг ижроси, ҳокимлар, унинг ўринбосарлари, тегишли бошқарма ташкилотларнинг ҳисобот ва ахборотларини эшитиш режалаштирилган.

Шундан сўнг, иштирокчиларнинг медиа-тур доирасидаги илк манзили Жиззах шаҳридаги аҳоли бандлигини таъминлаш, уларни касбга йўналтириш мақсадида бунёд этилган «Мономарказ» бўлди.

Қуввати бир вақтнинг ўзида 490 ўринли бўлган Жиззах шаҳридаги «Ишга марҳамат» мономаркази биносини таъмирлаш ва жиҳозлашда, Бандликка кўмаклашиш давлат жамғармаси ҳисобидан 14 миллиард 400 миллион сўм ва Жаҳон банкининг 1 миллиард 145 миллион сўмдан ортиқ маблағлари жалб этилган. Мазкур мономарказда 5 та хизмат тури, 22 турдаги касбга ўқитиш ва 5 та тил ўргатиш курслари фаолият юритмоқда.

Мономарказда «Ёшлар дафтари»га киритилган бандлиги вақтинча таъминланмаган жиззахлик йигит-қизлар учун сервис ва хизмат кўрсатиш соҳаси бўйича 8 та, техник соҳа бўйича 7 та, қурилиш соҳаси бўйича 5 та, қишлоқ хўжалиги соҳасида 2 та касб турлари ташкил этилган.

Шунингдек, хорижий тилларни ўргатиш курсида рус, инглиз, корейс, хитой ва япон тиллари, рақамли технологияларни ўргатиш курсида эса компьютер саводхонлиги, дастурчи 1С бухгалтерия мутахассисликлари ўргатилади.

Қайд этилишича, айни пайтда мономарказда 24 та касб-ҳунар ва 3 турдаги тил ўқув курсларида 317 нафар банд бўлмаган ёшлар ўқитилиб, касб-ҳунарга ўргатилмоқда.

• Жиззах
• Медиа-тур