Президент Шавкат Мирзиёев ёқилғи-энергетика соҳаси инвесторлар билан мулоқотда умумий қуввати 2 200 мегаватт бўлган 6 та қуёш ва шамол электр станцияси лойиҳаси яқин вақтда очиқ танловга чиқарилишини маълум қилди.

Давлат раҳбари дастлабки босқичда «яшил» энергетика қувватларини тез яратиш мақсадида лойиҳалар асосан инвесторлар таклиф қилган ҳудудларда жойлаштирилганини қайд этди. Бу катта миқдорда сармоя жалб қилиш имконини берган бўлса-да, айрим ҳудудларда электр ишлаб чиқариш қувватларининг тўпланиши энергияни бошқа ҳудудларга етказиш харажатларини оширган.

«Бизга алоҳида-алоҳида электр станциялари эмас, узвий боғланган энергетика тизими керак», — деди Президент.

Эндиликда электр энергиясига бўлган талаб ва зарур қувватлар ҳудудлар кесимида олдиндан режалаштирилади. Тайёр лойиҳалар очиқ танлов асосида инвесторлар ўртасида тақсимланади.

Танловга чиқариладиган ҳар бир лойиҳа бўйича ер майдони, электр тармоғига уланиш нуқтаси ва муддати, электр энергиясини харид қилиш ҳамда тўлов шартлари олдиндан эълон қилинади. Барча инвесторлар учун тенг талаблар белгиланиб, тўлов интизоми ва хатарларни камайтириш механизмлари мустаҳкамланади.

Давлат раҳбари инвесторларни умумий қуввати 2 200 мегаватт бўлган 6 та қуёш ва шамол электр станцияси лойиҳаси бўйича бўлажак очиқ танловларда иштирок этишга таклиф қилди.