Марказий Осиёда сув захиралари ва тоғ музликлари массаси камайиб бормоқда. Тадқиқотларга кўра, минтақадаги музликлар тўпланаётган музга қараганда кўпроқ муз йўқотмоқда.

Олимлар сўнгги йиллардаги кўрсаткичларни 1991–2020 йиллардаги ўртача маълумотлар билан таққослаган. Натижаларга кўра, Тожикистон, Ўзбекистон, Қирғизистон ва Афғонистондаги айрим сув ҳавзаларига сув оқими сезиларли даражада камайган.

Айниқса, Амударё ва Сирдарёни ўз ичига олган Орол денгизи ҳавзасида вазият жиддий экани қайд этилган. Марказий Осиёда дарё оқимининг ярмидан кўпи қор ва музликларнинг эриши ҳисобига шаклланади.

Тадқиқотларда 2025 йил минтақа музликлари учун кескин йўқотишлар кузатилган давр бўлгани қайд этилади. Ҳисоб-китобларга кўра, бир йил давомида Марказий Осиё музликлари қарийб 30 куб километр муз йўқотган. Бу минтақадаги мавжуд музликлар ҳажмининг қарийб 2 фоизига тенг.

Мутахассислар музликларнинг қисқаришига баҳор ва ёз ойларидаги юқори ҳарорат, қор ёғишининг камайиши ҳамда эриш мавсумининг одатдагидан эрта бошланишини асосий омиллар сифатида кўрсатмоқда.

Музликларнинг қисқариши узоқ муддатда минтақанинг сув хавфсизлигига таъсир қилиши мумкин. Чунки улар ёз ойларида сув таъминоти, қишлоқ хўжалиги ва гидроэнергетика учун муҳим табиий сув захираси ҳисобланади.