Президент Шавкат Мирзиёев энергетика соҳасидаги инвесторлар билан мулоқотда янги электр станциялари билан бир қаторда электр энергиясини истеъмолчиларга етказиб берувчи тармоқларни ҳам ривожлантириш зарурлигини таъкидлади. Генерация, узатиш ва энергия сақлаш тизимлари ўзаро боғлиқ ҳолда ишлаши кераклиги қайд этилди.

Ҳозирда Фарғона, Андижон ва Наманган вилоятларидаги электр энергиясига бўлган талабнинг бир қисми бошқа ҳудудларда ишлаб чиқарилган электр ҳисобидан қопланмоқда. Янги саноат зоналари ва йирик корхоналарнинг ишга туширилиши тармоқларга тушадиган юкламани янада ошириши кутилмоқда.

Сунъий интеллект ва дата-марказлар электр энергиясига талаб тез ўсаётган йўналишлар сифатида қайд этилди. Улар учун ер майдонлари, электр тармоқларига уланиш имкониятлари ҳамда «яшил» энергия манбалари мавжуд ҳудудлар олдиндан белгиланади.

Шунингдек, ҳар бир йирик дата-марказда асосий ва захира электр таъминоти, энергия сақлаш ҳамда совитиш тизимлари биргаликда режалаштирилади. Инвесторлар электр энергияси ва сув ресурсларидан самарали фойдаланишни таъминлайдиган ечимларни таклиф этиши кутилмоқда.