Бош прокуратура ҳузуридаги Иқтисодий жиноятларга қарши курашиш департаменти томонидан Кореяга ишга ва ўқишга юбориш билан боғлиқ бир нечта фирибгарлик ҳолатлари фош этилди. Маълум қилинишича, Тошкент вилоятида муқаддам судланган фуқаро М.А. икки нафар фуқарони Кореяга ишга юборишни ваъда қилиб, улардан 12 минг АҚШ долларини фирибгарлик йўли билан олган. Қувасой шаҳрида эса фуқаро Д.Р. бир фуқарони Кореядаги олий таълим муассасасига ўқишга киритиш ва виза расмийлаштириб беришни ваъда қилиб, 11 минг АҚШ долларини қўлга киритган.

Тергов давомида ушбу маблағнинг 200 доллари қайтарилган. Пахтаобод туманида муқаддам судланган Х.М. икки нафар фуқарони Канада ва Кореяга юбориш учун ҳужжат тайёрлаб бериш баҳонасида жами 4 945 АҚШ долларини фирибгарлик йўли билан олгани аниқланган. Барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.